සිංහල ගීතයේ චිර ජීවනය සහ ගීතයේ හිමිකාරිත්වය උදෙසා “ගීතයේ අයිතිය හා ගීතයේ ජිවය” නමින් සිදු කරනු ලබන විවෘත කතිකාවත සහ සංගීත සැඳෑව 24 වැනිදා එනම් අද දින පස්වරු 4.30 ට කොළඹ 7 ශ්‍රී ලංකා පදනම් ආයතනයේදී පැවැත්වීමට නියමිතය.

ගීතයේ සංගීතය පිළිබඳව සංගීතවේදී නදීක ගුරුගේ විසින් ද, ගීතයේ ගේය පද රචනය පිළිබඳව ලුෂන් බුලත්සිංහලයන් විසින් ද, ගීතය සහ ගායනය පිළිබඳව ෂර්ලි වෛජයන්ත විසින් ද දෙසුම් පවත්වනු ඇත.

එසේම බුද්ධිමය දේපල යටතේ වර්තමාන ගීතයේ අයිතිය පිළිබඳව නීතිඥ ගීතාංජලි රණවක විසින් පැහැදිලි කිරීමට නියමිතය.

ගීතයේ අයිතිය සහ ගීතයේ පැවැත්ම පිළිබඳ විවෘත සංවාදය පස්වරු 6.40 ට ආරම්භ කෙරේ.

වැඩසටහන මෙහෙයවීම ලාල් ආනන්ද අබේධීර, නිලාර් එම්. කාසිම් සහ කැලුම් ශ්‍රීමාල් විසිනි.

ශ්‍රී ලංකා ගුවන් විදුලි සංස්ථා වාද්‍ය වෘන්දය විසින් සංගීතය සපයනු ලැබේ.