ඔහුගේ අලුත්ම කවියක් ලෙස 'මහගෙදර' කවිය බොහෝ දෙනා සංවේදී කළ මාතෘකාවක් බවට පත්ව තිබේ. 

සමාජයේ පොදු යථාර්ථයක් සිය කවියේ ඒක වචන මාතෘකාවකින් පෙන්වා දීමට ඔහුගේ මෙම කවිය සමත් වී ඇත. 

 

මහ ගෙදර...

 

හාල් සේරු දෙකක් ඉදුණු ගෙදර

හාල් බෙලෙක්ක දෙකයි දැන් ඉදෙන්නේ

ඉස්සර තුන් වේලටම ඉව්වට

උදේ මාලුපිනිමයි හවසටත් කන්නේ

කෑ කෝ සද්ද බර බර කරදර

නෑ එහි දැන් දැන් ඇහෙන්නේ

තෙල් බෙහෙත් ගද ගේ පුරා

දුව පැන පැන ඇවිදන් යන්නේ

දෙවේලක් තෙවේලක් රත් වුණු

තේ පෝච්චිය නිකරුනේ නිවෙන්නේ

බණක් පිරිතක් ඇරුණම කිසිත්

මහගෙදර නෑ සිංදු ඇහෙන්නේ

අළුවා වැලිතලප හැලප

වන්ඩුවක්වත් නෑ ඉදෙන්නේ

ඒ රහ දන්න හැලි වලන්

දුම් මැස්සේ විශ්‍රාම ගන්නේ

අම්මේ තාත්තේ වචන ටික

ගොළුවො හොරකම් කර ගිහින්නේ

ලිපේ ගින්නට වැඩිය රස්නෙන්

දවස් අවසන හීල්ලෙන්නේ

අඹ රඹුටන් මැංගුස් ඉදි ඉදී

ගස් යට බිම වැටී යන්නේ

ඉස්සර වගේ පේර ගැටේටත්

නෑ කිසි කෙනෙක් රණ්ඩු වෙන්නේ

රස්සාවක් කසාදයක් ජීවිතේ කිව්වට

ඒක මහ බරක් කියලයි දැනෙන්නේ

මහ ගෙදර හිටි දවස් වල තමයි 

ඇත්තටම අපේ ජීවිතේ තිබ්බේ

බත් ගොඩක් මට කවපු හන්දාද අම්මේ

අපි හරි ඉක්මනින් ලොකු වුණේ පිම්මේ

අම්මලා ඔහේ  අපි මෙහේ තනියෙන්

ඉන්නවා දන්නවානම් නෑ කටක්වත් මං කන්නේ

 

 

යශී ගුරුසිංහ