විජිත මල්ලිකා මියගිහින් අදට වසර තිස් දෙකක්. ඒක දැනගත්තෙ බුකියෙ තිබුන සටහනකින්.
හැටේ දශකයේ වාණිජ සිනමාව බැබලවූ නිළියන් තිදෙනා. ජීවා, සන්ධ්‍යා සහ විජිතා. මේ තුන්දෙනා ගැන කියද්දි හැම විටම විජිතාගේ නම තුන්වැනියට කියවුනත් මම හිතන්නෙ තුන් දෙනාගෙන් දක්ෂම නිළිය ඇය.
නමුත් ඇයට දක්ෂතා පෙන්නන්න අවස්ථා ලැබුනේ අඩුවෙන්. ඇය අතට ලැබුනු අවස්ථාත් මගහැරුනු නිළියක්.
ටයිටස් තොටවත්ත ඔහුගේ පළවෙනි චිත්‍රපටයට (චණ්ඩියා) තෝරගත්තෙ විජිතාවලු. නමුත් ඇය කාර්‍ය්බහුල වීම නිසා ඒ අවස්ථාව අළුත් නිළියකට ගියාලු. ඒ අනුලා කරුණාතිලකට. එතනදිත් විජිතා අවාසනාවන්තයි.
හොඳම අවස්ථාව මේ එකක්වත් නෙවෙයි. ප්‍රවීණ නාට්‍යවේදී සුගතපාල ද සිල්වා අධ්‍යක්ෂණය කල එකම චිත්‍රපටය. මතක විදිහට නම රන් සමනළයෝ. සිංදු බර ගණනක් තිබුන සංගීතමය චිත්‍රපටයක්. ප්‍රධාන චරිත වලට තෝරගෙන තිබුනෙ ටෝනි සහ විජිතා. බාගෙට චිත්‍රපටය කරද්දි මුදල් ප්‍රශ්නයක් නිසා ඒක අතහැර දැමුනලු. සුගත් ආයෙ කවදාවත් චිත්‍රපටයක් කලේ නෑ. එතනදි නම් විජිතා විතරක් නෙවෙයි අපිත් අවාසනාවන්තයි.
විජිතා 1992 නොවැම්බර් වලදි මියගියේ පිළිකාවකින්. ඇය අගය නොකෙරුනු නිළියක්.
සුසන්ත ආරියරත්න - සිනමාවේදීන් The Cinema People
