ප්‍රකට අප්‍රිකානු ගායන ශිල්පියෙක් යතුරුපැදි අනතුරකින් ජිවිතක්ෂයට

බටහිර අප්‍රිකානු රාජ්‍යයක් වන අයිවරි කෝස්ට් හි ප්‍රකට ගායන ශිල්පියෙක් වන DJ Arafat යතුරුපැදි අනතුරකින් ජිවිතක්ෂයට පත්ව ඇති බව එරට මාධ්‍ය වාර්තා කරයි.

පසුගිය ඉරිදා (11) ඔහුගේ යතුරුපැදිය මෝටර් රථයක ගැටී ඇති අතර එම අවස්ථාවේ දී අබිජාන් නුවර පිහිටි රෝහලකට ඔහු ඇතුලත් කර තිබේ. රෝහලට ඇතුලත් කරන විට Arafat ගේ හිස් කබල බිඳී තිබු බව වාර්තා වෙයි.

33 හැවිරිදි මේ ගායන ශිල්පියා අනතුරින් ලැබූ තුවාල නිසා ඊයේ (12) දින මියගොස් ඇත.

ඔහු 2016, 2017 වසර සඳහා හොඳම ගායන ශිල්පියාට හිමි Coupe-Decale සම්මානයෙන් පිදුම් ලැබුවේ ය. Arafat ගේ වඩාත් ජනප්‍රිය ගීතයක් වන Dosabado යූ ටියුබ් සමාජ මාධ්‍ය ජාලය ඔස්සේ මිලියන 5කට අධික පිරිසක් නරඹා තිබේ.

Arafat ගේ හදිසි වියෝව සම්බන්ධයෙන් අයිවරි කෝස්ට් සංස්කෘතික අමාත්‍යවරයා, ඔහුගේ සමකාලිනයන් මෙන්ම ඔහුගේ රසික ප්‍රජාව ශෝකය පළ කර ඇත.