ස්වාධීන රූපවාහිනියෙන් විකාශය වන කූඹියෝ ටෙලි නාට්‍යය මෙගා නාට්‍ය රැල්ලට යටවී තිබූ මෙරට ටෙලි නාට්‍ය කර්මාන්තයේ හැරවුම් ලක්ෂයක් සනිටුහන් කළ ටෙලි නාට්‍යයක් බවට විවාදයක් නැහැ. කූඹියෝ කොටස් 50කට ආසන්න සංඛ්‍යාවක් මේ වන විට විකාශය වී තිබියදී ඊට පැසසුම් වගේම චෝදනාද ඇතැම් ප්‍රේක්ෂකයන්ගෙන් එල්ලවීමට පටන් ගෙන තිබෙනවා. වසර තුන හතරකට කලින් රූගත කර අවසන් කළා කියන කූඹියෝ සඳහා අලුතින් දර්ශන එකතු කර තිබෙන නිසා ටෙලි නාට්‍ය දැන් වෙනස් මගකට ගමන් කරනවා කියලයි ඇතැමුන් පවසන්නේ. කූඹියෝ අධ්‍යක්ෂ ලක්මාල් ධර්මරත්නව අප මෙලෙස සංවාදයකට එක්කාසු කර ගත්තේ එම චෝදනාවලට පිළිතුරු දීමට සුදුසුම පුද්ගලයා ඔහු වන නිසයි. 

50කට ආසන්න කොටස් සංඛ්‍යාවක් විකාශය වෙලා තියෙද්දී “කූඹියෝ” ගැන ප්‍රේක්ෂකයන්ගෙන් විවිධ චෝදනා පවා එල්ල වෙන්න පටන් අරන්. අධ්‍යක්ෂවරයා විදිහට ඔබ ඒ ගැන දැනුවත්ද? 

ඔව්. ඒ විදිහේ චෝදනා එල්ලවීම මටත්, “කූඹියෝ” පිටපත් රචක  දමිතටත් පුදුමයක් ‍නෙවෙයි. මොකද ටෙලි නාට්‍යයේ මේ අවධියට එද්දී ප්‍රේක්ෂකයන් සහ අපි අතරේ යම්කිසි ඝට්ටනයක් ඇතිවේවි කියලා අපි බලා‍පොරොත්තුවෙනුයි හිටියේ. 

ඔය කියන ඝට්ටනය ඇතිවීමට ප්‍රධාන හේතුව ටෙලි නාට්‍යය හදිසියේම ප්‍රේක්ෂකයන් නොහිතපු දිසාවකට ගලා යාමයි කීවොත් නිවැරදියි නේද? 

ඒක ඇත්ත. හැබැයි  මම විශ්වාස කරන දෙයක් තමයි අපි ප්‍රේක්ෂකයන්ට දෙන්නේ ඔවුන් බලා‍පොරොත්තු වෙන දේ නම් නිර්මාණකරුවෝ විදිහට අපෙන් වැඩක් නැහැ කියන එක. ඒ නිසා කූඹියෝ තුළින් ප්‍රේක්ෂකයන් නොහිතන විදිහේ දේවල් දෙන්නයි අපි නිතරම උත්සාහ කළේ. 

2014 වසරේ රූගත කළා කියන “කූඹියෝ” ටෙලි නාට්‍යයට 2015 වසරේ බලයට පත්වූ වත්මන් ආණ්ඩුව හඳුන්වාදුන් “බස් ‍ලේන්” වල දර්ශන ඇතුළත් වුණේ කොහොමද කියලා ප්‍රේක්ෂකයෝ ප්‍රශ්න කරනවා? 

කූඹියෝ ටෙලි නාට්‍යයට ප්‍රේක්ෂකයන්ගෙන් තිබෙන ඉහළ අවධානය නිසා ඔවුන් ටෙලි නාට්‍යයෙන් පෙන්වන ඉතාම සුළු දේවල් ගැන පවා හුඟක් සැලකිලිමත් වෙනවා.  බස් ‍ලේන් ගැන. හැබැයි Advertise කළේ වත්මන් ආණ්ඩුව වුණාට කලිනුත් ඒ ව්‍යාපෘතිය ක්‍රියාත්මක වුණා. මම මේ කියන ගැටලුවට ෆේස්බුක් හරහාත් සාක්ෂි ඇතිව පිළිතුරු දුන්නා. 

ඔබ කියන්නේ ටෙලි නාට්‍යයට අතරමැදදී කොටස් එකතුවුණේ නැහැ කියලද? 

ඔව්. ටෙලි නාට්‍යය පටන් ගනිද්දීත් මම කිව්වා කූඹියෝ කොටස් 58කින් අවසන් වෙනවා කියලා. අදටත් මම ඉන්නේ ඒ ස්ථාවරයේම තමයි. ඊට වඩා එක කොටසක්වත් වැඩිපුර විකාශය වෙන්නේ නැහැ. 

ඒ කියන්නේ අලුතෙන් කොටස් රූගත කරලා කියලා සමහරු කියන කතාවේ කිසිදු පදනමක් නැද්ද? 

සමහර Time lapses කිහිපයක් පමණක් අලුතින් රූගත කරන්න සිද්ධ වුණා. නමුත් එයින් කතාවේ කිසිදු වෙනසක් වෙන්නේ නැහැ. මොකද මුල් පිටපත අපි දශමයකින්වත් වෙනස් කරලා නැහැ. ප්‍රේක්ෂකයන්ගේ බයක් තියෙනවා වෙනත් සමහර ටෙලි නාට්‍යවලට වෙනවා වගේ විවිධ අයගේ වුවමනාවන්ට අනුව කූඹියෝත් වෙනස් වේවි කියලා. නමුත් අධ්‍යක්ෂවරයා විදිහට මම පැහැදිලිව කියනවා කාගෙවත් බලපෑම්වලට “කූඹියෝ” යටනොවන බව. 

කූඹියෝ ටෙලි නාට්‍යයේ ප්‍රියන්තගේ චරිතය දැන් හැසිරෙන්නේ ලංකාවේ ප්‍රකට දේශපාලකයෙක් වගෙයි කියලා ඇතැම් ප්‍රේක්ෂකයන් කියනවා. ඇත්තටම ඒ චරිතය ගොඩනගද්දී යම් කිසි දේශපාලකයකුව ආභාෂයට ගත්තාද? 

එහෙම කවුරුවත් ඉලක්ක කරගෙන ‍නෙවෙයි අපි ඒ චරිතය ගොඩනැගුවේ. අවසන් කොටස නැරඹුවාට පස්සේ ප්‍රේක්ෂකයන්ට මේ හැමදෙයක්ම තෝරා බේරාගන්න හැකි වේවි. 

කූඹියෝ මෙතරම් ජනප්‍රිය වෙලත් එහි නිර්මාණකරුවන්ට එයින් තවමත් පාඩුයි කියලාත් ඔබ මුහුණු‍පොතේ සටහනක් තබමින් පවසා තිබුණා. 

ඔව් තවත් කාලයක් තියාගෙන ඉන්න බැරි නිසයි අපි අඩු මුදලකට “කූඹියෝ” ස්වාධීන රූපවාහිනියට දුන්නේ. ටෙලි නාට්‍යයක් ලාබ ඉපැයුවා කියලා ලාබයෙන් කොටසක් එහි නිර්මාණකරුවන්ට දෙන ක්‍රමවේදයක් ලංකාවේ තවම ඇතිවෙලා නැහැ. ඒක ස්වාධීන රූපවාහිනියේ වරදක් ‍නෙවෙයි. ඒක මේ මුළු සිස්ටම් එකේම තියන වරදක්. මම ඒ අසාධාරණ ක්‍රමයට එරෙහිව දිගටම සටන් කරනවා.

කිෂාන් කංනකේ