“ශ්‍රේෂ්ඨ ඔක්තෝබර් විප්ලවයේ සියවස් සමරුව සහ රුසියානු සාහිත්‍ය උත්සවය 2017” කොළඹ නිදහස් මාවතේ පිහිටි රුසියානු සංස්කෘතික මධ්‍යස්ථානයේදී එළැඹෙන 29 වැනිදා පැවැත්වීමට කටයුතු සුදානම් කොට තිබේ.

ඔක්තෝබර් විප්ලවය ආශ්‍රිත ඡායාරූප හා ලේඛන ප්‍රදර්ශනයක් ද එදා මෙදාතුර සිංහලයට නැඟුණු රුසියානු හා සෝවියට් සාහිත්‍ය කෘති, පැරණි ‘සෝවියට් දේශය’ සඟරා ප්‍රදර්ශනයක් ද එදින පෙරවරු 10 සිට පැවැත්වීමට නියමිතය.

එසේම පස්වරු 4 ට ආරම්භ වන සාහිත්‍ය උත්සවය සඳහා අභ්‍යන්තර කටයුතු, වයඹ සංවර්ධන හා සංස්කෘතික කටයුතු අමාත්‍ය එස්. බි. නාවින්න, ශ්‍රී ලංකා රුසියානු තානාපති යුරි බොරිසොවිච් මටෙරි ඇතුළු සම්භාවනීය අමුත්තන් රැසක් සහභාගී වනු ඇත.     

ජෝන් රීඩ්ගේ “Ten days that shook the world” කෘතියේ එච්. ජයරත්න විසින් නිම කළ නව සිංහල පරිවර්තනය වන “ලොව කැළඹු දස දවස”, සිරිමාන්න කරුණාතිලක විසින් රචිත “ඔක්තෝබර් විප්ලවය හා සෝවියට් දේශයේ මුලාරම්භය” ශාස්ත්‍රීය ග්‍රන්ථය, ෆිලික්ස් ප්‍රනාන්දු රචිත “ලෙනින්ගේ ගීතය” නමින් වූ කෙටි කතා එකතුව සහ ඇලෙක්සැන්ඩ්‍රා කොලොන්තායි ගේ “උත්තම ආලයක කතාවක්” හි චුලානන්ද සමරනායකගේ පරිවර්තනය එදින එලි දැක්වීමට නියමිත ය.