රයිගම් ටෙලීස් දහහතර වන සම්මාන උළෙල එළැඹෙන වසරේ මාර්තු 24 දින කොළඹ නෙලුම් පොකුණ රඟහලේදී පැවැත්වීමට නියමිතය.

උළෙල සඳහා අයැදුම්පත් හා නිර්මාණ භාර ගැනීම මේ වන විට ආරම්භ කර ඇත. එය 2018 ජනවාරි 15 දිනෙන් අවසන් වේ.

මෙවර උළෙල නියෝජනය කිරීම සඳහා 2017 වර්ෂය තුළදී අවසාන කොටස විකාශය කළ දේශීය ටෙලි නාට්‍ය සුදුසුකම් ලබන අතර වෙනත් නිර්මාණ ඉදිරිපත් කරන්නේ නම් එය 2017 වර්ෂය තුළ දී ශ්‍රී ලංකාවේ රූපවාහිනී නාළිකාවක් ඔස්සේ ප්‍රථම වරට විකාශය වී තිබිය යුතුය. නැවත විකාශනය කළ නිර්මාණ සලකා නොබැලේ.

වසරේ විශිෂ්ටතම ගායන, රංගන, තාක්‍ෂණ හා ටෙලි නාට්‍ය නිර්මාණ කුසලතාවන් අගයමින් වසරේ විශිෂ්ටතම ප්‍රාසාංගික ඒකාංගික ටෙලි නාට්‍ය ඇතුළු විශිෂ්ටතා සම්මාන මෙහිදී ප්‍රදානය කෙරේ.

එසේම ජනතා මනාපයට අනුව සිත් ගත් ටෙලි නාට්‍ය, ටෙලි නාට්‍ය නළුවා, නිළිය තෝරා පත් කරගැනීමේ අවස්ථාව මෙවරත් ප්‍රේක්ෂකයන්ට හිමි වේ.

මෙවර සම්මාන උළෙල සඳහා නිර්මාණ ඉදිරිපත් කිරීමට අපේක්‍ෂිත නිර්මාණකරුවන්ට 0114886777 හෝ 4886888 අංක අමතා වැඩිදුර විස්තර ලබා ගත හැකිය.