පුංචි තිරයේ මහා කලා මංගල්‍යය ලෙස සැලකෙන සුමති සම්මාන උළෙල අගෝස්තු 29 වැනිදා සවස නෙළුම් පොකුණ රඟහලේදී අති උත්කර්ෂවත් අයුරින් පැවැත්වීමට සියලු කටයුතු මේ වනවිටත් සුදානම් කොට තිබේ.

ඒ අනුව සම්මාන සඳහා නිර්දේශිත නාමයන් ප්‍රකාශයට පත් කිරීම 14 වැනි අඟහරුවාදා දින කොළඹ ජයික් හිල්ටන් හෝටලයේ දී සිදු කෙරුණි.

ඒ සඳහා කලාකරුවන් මාධ්‍යවේදීන් ඇතුළු විශාල පිරිසක් සහභාගී වී සිටියහ.

23 වැනි වරට සංවිධාන කෙරෙන මෙම සම්මාන රාත්‍රියේදී සම්මාන 60 කට අධික සංඛ්‍යාවක් පිරිනැමීමට නියමිත ය.

2017 වසරේදී රූපවාහිනීය ඔස්සේ විකාශනය වූ වැඩසටහන් සියල්ල සම්මාන සඳහා සලකා බලන අතර ඒ අතුරින් සුවිශේෂී දක්ෂතා ප්‍රකට කළ නිර්මාණකරුවන් සහ නිර්මාණ සඳහා එහිදී සම්මාන හිමිවෙනු ඇත.

ප්‍රේක්ෂක මනාප අනුව වසරේ ජනප්‍රිය නළුවා, නිළිය සහ ටෙලිනාට්‍ය තෝරා ගැනීමද සිදු වන අතර එහි ඉදිරියෙන්ම සිටින නළුවන් 15 දෙනා සහ නිළියන් 15 දෙනා වෙත සහතිකපත් ප්‍රදානය කිරීමද ඊයේ දින සිදුකෙරුණි.