ආසියානු මාධ්‍ය ජාලය විසින් තෙවැනි වරටත් සංවිධාන කරනු ලබන “හිරු ගෝල්ඩන් ෆිල්ම් අවෝඩ්ස්” එළඹෙන 27 වැනිදා සුගතදාස ගෘහස්ත ක්‍රීඩාංගනයේ දී පැවැත්වීමට නියමිත ය.
පසුගියදා පැවති මාධ්‍ය දැනුවත් කිරීමේ හමුවකදී උළලේ සංවිධායකයින් ප්‍රකාශ කර සිටියේ මෙම උළෙල සඳහා ගෝවින්දා, ජූහි චවුලා, සාහිෆ් අලි ඛාන්, ශිල්පා ශෙට්ටි, සිද්ධාර්ථ මල්හෝත්‍රා, සරීන් ඛාන්, සෝනක්ෂි සිංහා නම් බොලිවුඩ් රංගන ශිල්පින් ශිල්පිනියන් හත් දෙනා සහභාගී වන බවයි.
2016 සහ 2017 වසර වල තිරගත කළ සිනමාපට පනහක් සහ කෙටි චිත්‍රපට එකසිය පනහක් “හිරු ගෝල්ඩන් ෆිල්ම් අවෝඩ්ස්” උළලේදී විනිශ්චයට ලක්වනු ඇත.
එසේම කලාත්මක, ජනප්‍රිය හා විශේෂ කාණ්ඩයන් අතරින් සම්මාන හතළිහක් ප්‍රධානය කිරීමට නියමිත ය.
ජනප්‍රිය සිනමා ගීතය, රංගන ශිල්පියා, ශිල්පිනිය යන සම්මාන තුන සඳහා කෙටි පණිවිඩ හා වෙබ් අඩවිය ඔස්සේ ජනතා මනාපය පළ කිරීමට අවස්ථාව සලසා දී ඇතැයි සංවිධායකයෝ පවසති.
ඒ අනුව ජනප්‍රිය සම්මානය සඳහා තේරී පත් වී ඇති රංගන ශිල්පින් වන්නේ උද්දික ප්‍රේමරත්න, ගයාන් වික්‍රමතිලක, දසුන් පතිරණ, ධනංජය සිරිවර්ධන, ධනුක දිල්ෂාන්, පුබුදු චතුරංග, රොෂාන් රණවන, විශ්ව කොඩිකාර, සාරංග දිසාසේකර, හේමාල් රණසිංහ ය.
රංගන ශිල්පිනියන් ලෙස අරුණි රාජපක්ෂ, උදාරි වර්ණකුලසුරිය, උපේක්ෂා ස්වර්ණමාලි, උමාලි තිලකරත්න, චුලක්ෂි රණතුංග, තාරුකා වන්නිආරච්චි, තිසුරි යුවනිකා, දිනක්ෂි ප්‍රියසාද්, පුජා උමාශංකර්, යුරේනි නොෂිකා තේරී පත්ව තිබේ.
