කන්ගනා රඟන “මනිකර්ණික” හෙට සිට රිදී තිරයට
ප්‍රකට බොලිවුඩ් රංගන ශිල්පිනි කන්ගනා රනාවුත් රඟන නවතම සිනමා නිර්මාණය “මනිකර්ණික:ද ක්වින් ඔෆ් ජාන්සි” හෙට (25) සිට ඉන්දියාවේ තිරගත කෙරේ.
ඉන්දීය ජනරජ දිනයට සමගාමිව ප්‍රදර්ශන කටයුතු ආරම්භ කෙරෙන මෙම සිනමා කෘතිය ඉහළ ආදායම් වාර්තා තබනු ඇතැයි විචාරකයෝ මත පළ කරති.
රාජා ගංගාධර් රාඕ සමග විවාහ වීමෙන් පසුව ජාන්සි නුවර රැජින බවට පත්වන මානුබි තාම්බේ නම් තරුණියගේ චරිතයට කන්ගනා පණ පොවයි. යුද භූමියේදී සිය ස්වාමියා මියයාමෙන් අනතුරුව ජාන්සි හි පාලකයා බවට පත්වන ඇය බ්‍රිතාන්‍ය පාලනයට එරෙහිව සටන් මෙහෙයවන්නි ය.
අන්කිතා ලෝකන්දේ, රිචර්ඩ් කීප්, ඩැනි ඩෙන්සොන්ග්පා, සුරේෂ් ඔබ්රෝයි, කුල්භුෂන් ඛර්බන්ධා “මනිකර්ණික” චිත්‍රපටයේ සෙසු චරිත සඳහා රංගන දායකත්වය සපා තිබේ.
