SAG සම්මාන රාත්‍රියේ ඉහළම සම්මානය “බ්ලැක් පැන්තර්” ට
ස්ක්‍රීන් ඇක්ටර්ස් ගිල්ඩ් (SAG) සම්මාන උළලේ ප්‍රමුඛතම සම්මානය තමන් සතු කරගැනීමට බ්ලැක් පැන්තර් සුපිරි වීර සිනමාපටය සමත් වී තිබේ.
ඊයේ (27) දින ඇමරිකාවේ ලොස් ඇන්ජලිස් හිදී පැවැත්වූ උළලේ දී විශිෂ්ටතම නළු නිළි කැල වෙනුවෙන් ලැබෙන සම්මානය ඇතුළු සම්මාන දෙකක් ඒ අනුව බ්ලැක් පැන්තර් චිත්‍රපටයට හිමිවිය.
හොඳම රංගන ශිල්පියා ලෙස Bohemian Rhapsody සිනමාපටයේ රමී මලික්, හොඳම රංගන ශිල්පිනිය ලෙස The Wife සිනමාපටයේ ග්ලෙන් ක්ලෝස්, හොඳම සහාය රංගන ශිල්පියා ලෙස Green Book සිනමාපටයේ මහෙර්ෂලා අලි , හොඳම සහාය රංගන ශිල්පිනිය ලෙස A Quiet Place සිනමාපටයේ එමිලි බ්ලන්ට් එහිදී සම්මාන දිනා ගත් හ.
සිනමා කර්මාන්තය වෙනුවෙන් කළ කැපවීම උදෙසා ප්‍රවීන කලාකරු ඇලන් අල්ඩා සම්මාන රාත්‍රියේ දී ඇගයීමට පාත්‍ර විය.
