සුළග අප රැගෙන යාවි’ පසුගිය විසි දෙවැනි දා සිට දිවයින පුරා සිනමාහල්වල ප්‍රදර්ශනය කෙරෙන වෙනස්ම ආරක කතාවක් රැගත් චිත්‍රපටයක්. ඒ නිසාමයි මේ චිත්‍රපටයට පසුගිය අන්තර්ජාතික සම්මාන උලෙළ කිහිපයකදීම සම්මාන හිමි වුණේ. එහි තිරපිටපත් රචකයා මෙන්ම අධ්‍යක්ෂවරයා වන්නේ තරුණ සිනමාකරුවෙකු වන නුවන් ජයතිලක.
‘සුළඟ අප රැගෙන යාවි‘ සිනමාපටයේ අධ්‍යක්ෂ වගේම තිර රචකයාත් ඔබයි..
ඔව්. මෙම චිත්‍රපටයේ අධ්‍යක්ෂණය වගේම තිර රචනයත් මගේ. මම මේ චිත්‍රපටය හදන කාලෙ මේ රටේ තිබුණෙ ජාතක කතා, ඓතිහාසික කතා, ආදර කතා ඇතුළත් චිත්‍රපට. ඉතින් මට හිතුණා මගේ චිත්‍රපටය ළමයින් සහ පවුල තේමාකරගත් චිත්‍රපටයක් ලෙසින් ප්‍රේක්ෂකයන් අතරට ගෙන යා යුතුයි කියා. ඒ සඳහා විවිධ විෂයයන් තුළින් ලබාගත් දැනුම සහ අත්දැකීම් රැසක් ගොනුකොට 'සුළඟ අප රැගෙන යාවි' සිනමාපටය නිර්මාණයකළා. මගේ උත්සාහය සාර්ථකවුණා. ඉතාලියේ අන්තර්ජාතික චිත්‍රපට උලෙළකදී රටවල් 165ක් පරදා හොඳම චිත්‍රපටයට හිමි සම්මානය හිමිවුණා. ඒ වගේම ඌස්ටන් අන්තර්ජාතික සම්මාන උලෙළ, ලන්ඩන් ආසියානු, මෙල්බන්, ටොරෙන්ටෝ ඉන්ටර් නැෂනල් ආදී සම්මාන උලෙළවල් නියෝජනය කරමින් සම්මාන හිමිකරගත්තා.
ඇයි ළමා චිත්‍රපටයක් නිර්මාණය කරන්න හිතුවේ..
ළමයා සිනමා ශාලාවට තනියෙන් එන්නෙ නැහැනේ, ඒ එනකොට අම්මා, තාත්තා පමණක් නොවෙයි ආච්චි සීයා ගේ පටන් සියලු දෙනාම පැමිණෙනවා. පවුල කේන්ද්‍ර කරගෙන සිනමාවට ප්‍රවිෂ්ට වු විට මගේ ගමන යෑම පහසුවක් යැයි සිතුණා. එනිසයි ළමා චිත්‍රපටයකින් සිනමාවට ප්‍රවිෂ්ට වන්න සිතුවේ.
ළමයි ගැන මොනවද මෙහි කතා කරන්නෙ..
මේ චිත්‍රපටයෙන් මවාපාපු, ඕලාරික කතාවකට එහා ගිය යථාර්ථය පෙන්වන කතාවක් අන්තර්ගතයි. ඒ වගේම නකල්ස් කඳුකරයේ මීමුරය කියන ලස්සන ගම්මානයේ ස්වභාව සෞන්දර්යයත්, අපේ රටේ අවසන් තවලම ගැන කියැවෙනවා. ගම නගරය සම්බන්ධ වීමෙන් පැන නගින ගැටලු සහ මිනිසුන් මුහුණ දෙන සිදුවීම් ගැන සියුම් ලෙස කාව්‍යාත්මක විග්‍රහයක යෙදෙනවා. මේ සියලු සිදුවීම් ගෙනහැර දක්වන්නේ ළමයි මූලික කරගෙන.
මෙවැනි තේමාවක් සිනමා පටයකට ගෙන එන්න කිසියම් හේතුවක් බලපෑවාද ?
මීට වසර කිහිපයකට පෙර මම පුවත්පත් කලාවේදියකු මෙන්ම ඡායාරූප ශිල්පියකු ලෙස ජාතික පත්තර කිහිපයකම වැඩ කළා. එහිදී කලාව පිළිබඳව වගේම යුද්ධය පසුබිම්කරගත් විශේෂාංග ලිපි ලිවීම සිදු කළා. ඔය කාලයේදී රටේ හැම අස්සක් මුල්ලක් නෑරම ඇවිද්දා. ඔහොම යනකොට තමයි මීමුරේ හා සම්බන්ධ අන්තිම තවලම පිළිබදව දැනගත්තේ. එයත්, මගේ ජීවිතේ මුහුණදුන් ඇතැම් සිදුවීමුත් පාදක කරගෙන තමයි තිර පිටපත ලියැවුණේ.
චිත්‍රපටයකට ඇතුළත් කරන්න තරම් ඔබේ ජීවිතයේ තිබෙන සුවිශේෂි සිදුවීම් මොනවාද?
චිත්‍රපටයකට නෙමෙයි පොතක් ලියන්න තරම් සිදුවීම් තියෙනවා. මම ටිකක් කෙටියෙන් කියන්නම්. මගේ ගම රත්නපුරේ ලෙල්ලුපිටිය. ප්‍රවීණ රංගධර ජෝ අබේවික්‍රමයන්ගේ ගම. ලෙල්ලුපිටිය රාහුල පාසලෙන් සහ රත්නපුරේ ධර්මපාල විදුහලෙන් අධ්‍යාපනය හැදෑරුවා. පාසලේදී රඟ පෑ 'බෙරහඬ' කියන ළමා නාට්‍යය සමග කොළඹ එනවා. එහි මම රඟපෑවේ යකැදුරකුගේ චරිතයක්. ඉන් පසුව මම ම හදාගත්ත නාට්‍යවල රඟ පෑවා. නළුවකු වෙන්න අවස්ථාව ලැබුණත් මට ඕනෑවුණේ රචකයකු වෙන්න. ඉන්පසුව වේදිකා නාට්‍යවලට සම්බන්ධ වෙන්න කොළඹට එනවා. ඒ ඇවිත් නාමෙල් මාලනී පුංචි තියටර් හිදී අවුරුද්දක් විතර වැඩකළා. ඔය කාලය ගතකළේ මහපාරෙමයි. විවිධ සිදුවීම්වලට මුහුණ දුන්නා. බොහෝ දුක් වින්දා. පුවත්පත් කලාවේදියකු ලෙස වැඩකළා.
ඒ කාලයේදි හඳුනාගත් මනෝහාරි හේවාවසම් අක්කා ඇය නිෂ්පාදනය කළ 'සුළඟ එනු පිණිස' චිත්‍රපටයට පසුව කළ වාර්තා වැඩසටහනේ සහායකයකු ලෙස වැඩ කරන්න මට අවස්ථාව දුන්නා. ඉන් පසුව 'අහසින් වැටෙයි' චිත්‍රපටයේ සහාය අධ්‍යක්ෂ සහ කලා අධ්‍යක්ෂ යටතේ වැඩ කරනවා. ඔය කාලයේදී විදේශීය රටවල නළු නිළියන්, තාක්ෂණික කණ්ඩායම් සමග වැඩ කරලා චිත්‍රපටවලදී සිදුවන සියලු දේ ඉගෙන ගත්තා. ඉන් පසුව ෆ්රේම්ස් කියලා වෙළෙඳ දැන්වීම් ආයතනයක් පවත්වාගෙන යනවා. ඔය විදිහට කලාව පිළිබඳත්, විවිධ විෂයයන් පිළිබඳවත් අධ්‍යයනය කරන්නට හැකිවූවා.
ඔය කාලයේදී ජීවිතයේ තවත් සිදුවීමක් වනවා..
ඉන්දියාවේ පුනේ සිනමා පාසලේ පාඨමාලාව හදාරලා කෙටි චිත්‍රපටයක් කළා. ඒකත් එක්කම මුහුණු පොතේ ජනප්‍රිය චරිතයක් වුණා. ප්‍රවීණ ගත් කතුවර සයිමන් නවගත්තේගම මහතාගේ දියණිය මායා නවගත්තේගම හමුවන්නේ මුහුණු පොතෙන්. කුඩා කාලයේ සිටම සයිමන් නවගත්තේගම මහතාගේ පොත් කියවන්න තිබූ ඇල්ම නිසා ඔහුගේ දඩයක්කාරයාගේ කතාව චිත්‍රපටයක් කරන්න තියෙන අදහස ගැන ඇයට කියුවා. ඒ අතරේ ඇය ලංකාවට ආවා. එහිදී අප අතර ඇතිවන හිතවත් කමත් එක්ක අපි පෙම්වතුන් වුණා. අන්තිමට දඩයක්කාරයාගේ කතාව චිත්‍රපටයකට නගන්න නොහැකිවුණත් අපි විවාහ වෙනවා.
'සුළඟ අප රැගෙන යාවි' නිෂ්පාදිකාව ඇයයි..
මමත්, මායාත් 'සුළඟ අප රැගෙන යාවි' චිත්‍රපටයේ පිටපත අරගෙන නිෂ්පාදකවරු සොයමින් ගියත් හමුවුණේ නෑ. පසුව ඇය කීවා අතේ තියෙන මුදලින් කෙසේ හෝ චිත්‍රපටය කරමු කියා. ඒ විදිහට තමයි චිත්‍රපටයේ වැඩ අවසන් කළේ. ඉන් පසුව මම තීරණය කළා චිත්‍රපටය අරන් එංගලන්තයට යනවා කියලා. එහේ ගිහින් තමයි මේ සිනමාපටය අන්තර්ජාතික සිනමා උලෙළ ගණනාවකටම ඉදිරිපත් කරන්නෙ. අද වනවිට ලොවපුරා දර්ශනවාර 68ක් පෙන්වා තිබෙනවා.
ඔබ එංගලන්තයේ මොකද කරන්නේ..
තිරපිටපත් රචකයෙක්, නිෂ්පාදකවරයෙක්, අධ්‍යක්ෂවරයෙක් ලෙස වැඩ කරනවා වගේම තුන්වැනි ලෝකයේ චිත්‍රපට යුරෝපයට බෙදා හරින්නකු ලෙසත්, අන්සීන් පික්චර්ස් ලන්ඩන් කියන ආයතනයත් පවත්වාගෙන යනවා.
මීළඟ සැලැසුම ..
ඉංග්‍රීසි චිත්‍රපටයක් කරන එක. එහි තිරපිටපත දැනටත් ලියාගෙන යනවා. ඒ වගේම ලංකාවේ ළමා චිත්‍රපටයක් කරන්නත් බලාපොරොත්තුවක් තිබෙනවා. අපේ රටේ චිත්‍රපට පෙන්වීම විධිමත් නොමැති කමින් අපි වගේ නවක නිර්මාණකරුවන්ට හිස ඔසවන එක ලෙහෙසි පහසු වැඩක් නෙවෙයි. නමුත් උත්සාහ කරනවා. ඒ වගේම චිත්‍රපට බෙදාහරින්නෙක් සහ චිත්‍රපට නිෂ්පාදකයෙක් වෙන බලාපොරොත්තුවත් තියෙනවා. තව නවකතා රචකයෙක් වෙන්නත් කැමැතියි.
නයනා වෑත්තෑව
සිළුමිණ
