මීට වසර තිස් එකකට පෙර ගරු මර්සිලින් ජයකොඩි පියතුමන් විසින් රචනාකොට තනුව ද නිර්මාණය කළ ධීවර ගීතය අද වන විට මුලුමනින්ම නෑසී යන තත්ත්වයක් උදාවී ඇතැයි මීගමු දූවේ ධීවර ජනතාව කියා සිටිති.
ඒ වෙනුවට දැනට නිල ධීවර ගීතය වශයෙන් හැඳින්වෙනුයේ හිටපු ජනාධිපති මහින්ද රාජපක්ෂ මහතා ධීවර ඇමති ධුරයේ කටයුතු කරන අතරේ හඳුන්වාදුන් වෙනත් ධීවර ගීතයක් බව පවසන මීගමු දූවේ ධීවරයෝ තම සැබෑ ධීවර උරුමය ජීවමානවම ඉදිරිපත් කෙරෙන මර්සිලීනු ජයකොඩි පියතුමන් ලියූ මුල් ධීවර ගීතයද යළි ජනතාව හමුවට ගෙන ඒමට කටයුතු කරන මෙන් ජනාධිපති තුමා, අග්‍රාමාත්‍ය තුමා, ධීවර හා ජලජ සම්පත් අමාත්‍යවරයාගෙන්ද මාධ්‍ය ආයතන වලින්ද ඉල්ලා සිටිති.
“අපි කරන්නේ බොහොම අහිංසක ඉල්ලීමක්; මහින්ද රාජපක්ෂ මහත්තයා ධීවර ඇමති හැටියට කටයුතු කරපු කාලේ ප්‍රවීන ගීත රචක සුනිල් සරත් පෙරේරා මහතා ලවා ලියවා ගත් ධීවර ගීතයක් ආචාර්ය රෝහණ වීරසිංහයන් ලවා සංගීතවත් කොට නිල ධීවර ගීතය ලෙස ජනගත කොට තිබුණා. නමුත් ඒ වන විටත් මර්සිලීනු ජයකොඩි පියතුමා ලියූ ධීවර ගීතයක් තිබූ බව සැලකිල්ලට ගැනුණේ නැහැ. ඊට හේතුව ඒ වන විටත් මුල් ධීවර ගීතය සමාජයෙන් යටපත් වෙමින් තිබූ නිසා විය හැකියි. දෙවනුව නිර්මාණය කළ ධීවර ගීතය ඉතා විශිෂ්ට පද රචනයක් සහ විශිෂ්ට සංගීත සංයෝජනයක් සහිත රසවින්දනාත්මක ගීතයක්. නමුත් ධීවර ජනතාව හැටියට අපි බලන්නේ තවත් පැත්තකින්. මර්සිලීනූ ජයකොඩි පියතුමා ලියූ ධීවර ගීතයේ වචන සහ නාද රටාව මඟින් ධීවර හද ගැස්ම ඊට වඩා ප්‍රබල ලෙස නිරූපනය වන බව අපගේ වැටහීමයි.
එනිසා මුලුමනින්ම අභාවයට ගොස් ඇති මුල් ධීවර ගීතය නැවතත් ජනතාව අතරට පත් කරන ලෙස අප ඉතා කාරුණිකව ඉල්ලා සිටිනවා.” මීගමු දූවේ ධීවරයෝ එසේ කියති.
ඒ අනුව එම මුල් ධීවර ගීතය දැනට ධීවර අමාත්‍යංශය තුළ සංරක්ෂණය වී තිබේ දැයි අප විසින් කළ විමසුමක දී එහි නිලධාරියෙකු කියා සිටියේ දැනට අමාත්‍යංශය සතුව ඇත්තේ සුනිල් සරත් පෙරේරා සූරීන් ලියූ, ආචාර්ය රෝහණ වීරසිංහයන් සංගීතවත් කළ ධීවර ගීතය පමණක් බවය.
ඉන්පසු මුල් ධීවර ගීතය සංරක්ෂණය වී තිබේ දැයි අපි ශ්‍රී ලංකා ගුවන් විදුලි සංස්ථාවෙන්ද විමසුමක් කළෙමු.
එවිට අපට දැන ගත හැකි වූයේ ශ්‍රී ලංකා ගුවන් විදුලි සංස්ථා තැටි ගබඩාවෙහි දෙවන ධීවර ගීතය සංරක්ෂණය වන නමුත් සෙසු ධීවර ගීත ලැයිස්තුවේ වත් මුල් ධීවර ගීතය නොමැති බවය. ඒ අනුව එසේ අතුරුදන් වූ ධීවර ගීතයේ අතීත කථාව සොයා යාමට අපි යුහුසුළු විමු.
1986 වසරේ ලෝක ආහාර දින සැමරුම් උත්සවය එවක ජනාධිපති ආර්.ප්‍රේමදාස මහතාගේ ප්‍රධානත්වයෙන් මීගමුවේ දී පැවැති අතර එවක ධීවර ඇමතිවරයා ලෙස කටයුතු කරන ලද්දේ පෙස්ටස් පෙරේරා මහතාය.
එම ලෝක ආහාර දින උත්සවය වෙනුවෙන් ධීවර ගීතයක් ඉදිරිපත් කිරීම සඳහා තරඟයක් පැවැති අතර ඒ සඳහා මීගමු දූවේ ධීවරයෝ ද මහත් උනන්දුවක් පළ කළහ.
ඒ අනුව ඔවුහු එවක කොළඹ හැව්ලොක් ටවුමේ පූජක නිවහනක වාසය කළ හෙළයේ මහා කලාකරුවෙකු ද වන මර්සිලීනු ජයකොඩි පියතුමා හමුවට ගොස් තම අවශ්‍යතාව පිළිබඳ කියා සිටියහ. එවිට ඒ ඉල්ලීමට අනුව ධීවර ගීතයක් රචනා කළ ජයකොඩි පියතුමා ඒ සඳහා තනුවක් ද මුවින් හඬ නැංවීය. ඉන්පසුව මීගමු දූවේ තරුණ තරුණියන්ට එම ගීතය පුහුණු වීම සඳහා හැව්ලොක් ටවුමට ඒමට ඇති අපහසුව සලකා පියතුමා සිය කැමැත්තෙන්ම මීගමු දූවේ ජෝෂප් ද මෙල් නමැති කලා කරුවාගේ නිවසට පැමිණ මීගමු දූවේ තරුණ තරුණියන්ට එම ගීතය පුරුදු කළේය.
කෙසේ හෝ එම ගීත තරඟය සඳහා කණ්ඩායම් 08 ක් ඉදිරිපත් වූ අතර කොළඹ ශ්‍රී ලංකා පදනම් ආයතනයේ දී පැවැති උත්සවයක දී ඒ ගී අතරින් මුල් තැන හිමිවූයේ මීගමු දූවේ තරුණ තරුණියන් ඉදිරිපත් කළ ජයකොඩි පිය තුමා ලියා මුවින් තනුව යෙදූ “අපි වෙමු මහ සාගරයේ දරුවෝ” ධීවර ගීතයටය. එහිදී එම ගීතය ඉදිරිපත් කිරීමේ දී තාල තරංග හැරුණු කොට වෙන කිසිදු වාදනයක් ඉදිරිපත් නොවීමද විශේෂත්වයකි.
1983 වසරේ පිලිපීනයෙන් ‘මැග්සාසේ ‘ සම්මානය හිමිවීම මුල් කොට පියතුමාගේ ගී නිර්මාණ ඇතුලත් කැසට් පටයක් ශ්‍රී ලංකා ගුවන් විදුලි සංස්ථාව මගින් නිකුත් කෙරුණු අතර ඒ සඳහා සංගීත සංයෝජනයන් ද සහිතව මෙම ගීතය පටිගත කිරීමට ගුවන්විදුලි සංස්ථාව ඉදිරිපත් විය.
මර්සිලීනු ජයකොඩි පියතුමාගේ තනුවක් සහිත මෙම ගීතයට සංගීත සංයෝජනය කරන ලද්දේ එවක ශ්‍රී ලංකා ගුවන් විදුලියේ සංගීත පාලකව සිටි දයාරත්න රණතුංග සහ වාදක මණ්ඩල ප්‍රධානී ස්ටැන්ලි එම්.ප්‍රනාන්දු යන කලා කරුවන් විසිනි.
මෙම ගීතය පටිගත කරන අවස්ථාවේ මර්සිලීනු ජයකොඩි පියතුමාද එහි පැමිණ සිටි අතර පියතුමන් හා සමීප සබැඳියාවක් ඇති ප්‍රවීණ ගායකයෙකු, වාදකයෙකු සහ සංගීත අධ්‍යක්ෂවරයෙකුද වන කලා කරුවෙක් එහි පැමිණ “ෆාදර් ට කරන උදව්වක් හැටියට මමත් මේ සින්දුවට වොයිස් කරන්න දැයි” ඇසීය. එවිට පියතුමා සිනාසී කියේ “එපා එපා මට මේකට දූවේ කොල්ලන්ගෙ කෙල්ලන්ගෙ කටහඬ හොඳටම ඇති” යනුවෙනි.
කෙසේ හෝ ඉන්පසුව නෙළුම් පිපීලා යනුවෙන් ශ්‍රී ලංකා ගුවන්විදුලි සංස්ථාව නිකුත් කළ කැසට් පටයකට මෙම ධීවර ගීතය ඇතුළත් කළද එය තැටිගත කරන ලද බවක් හෝ එවන් තැටියක් ශ්‍රී ලංකා ගුවන්විදුලි සංස්ථාවේ තැටි ගබඩාවේ හෝ ඒ සම්බන්ධ ලේඛනයක ඇති බවක් හෝ දැනගන්නට නැත.
කිසියම් පුද්ගලයෙකු හෝ පිරිසක් විසින් මෙම ගීතය හිතා මතා වසන් කරන ලද්දේ ද යන සැකය තමන් තුළ පවතින බව මීගමු දූවේ ධීවරයෝ කියති.
ඒ අනුව ඔවුන් පවසා සිටිනුයේ සැබෑ ධීවර ප්‍රජාවක් තුළින් මතුවී මෙරට විසූ විශිෂ්ඨතම උත්තම ගණයේ කලා කරුවෙකු වන මර්සිලීනු ජයකොඩි පියතුමන්ගේ පද රචනයෙන් සහ තනුවෙන් හැඩ ගැන්වුණු දැනට සමාජයෙන් වසන් වී ඇති හැබෑ ධීවර ප්‍රජාවක් තුළින් මතුවූ මෙම ධීවර ගීතය නැවත සමාජ කරලියට ගෙන ඒමට කටයුතු යොදන ලෙසය.
මර්සිලින් ජයකොඩි පියතුමා ලියූ සහ සුනිල් සරත් පෙරේරා ලියූ ධීවර ගීත මෙතනින් සවන් දිය හැක.
මර්සිලින් ජයකොඩි පියතුමා ලියූ ධීවර ගීතය
සුනිල් සරත් පෙරේරා ලියූ ධීවර ගීතය
