ප්‍රකාශ් රාජ්
තමිල්නාඩුවේ ගෞරවණීයම සිනමා වීරයන් දෙදෙනා දේශපාලනයට පැමිණෙන බව නිල වශයෙන් ප්‍රකාශ කොට වසරකටත් වඩා වැඩි කාලයක් ගෙවී ගොස් හමාරයි. කමල් හසන් හා රැජිණිකාන්ත් එකිනෙකට වෙනස් දේශපාලන පක්ෂ දෙකක මෙන්ම වෙනස් මාවත් දෙකක දේශපාලනයේ යෙදෙන බව දැනටමත් පෙනෙන්නට තියෙනවා.
මේ පෙන්වාදීම කරන්නට හේතුවුණේ රැජිණිකාන්ත් ගැන හෝ කමල් හසන් නම් දෙමළ සිනමාවේ අසහාය වීරයන් දෙදෙනාගේ දේශපාලනය ගැන කතාකරන්නට නෙවෙයි. දෙමළ සිනමාවේ අසහාය දුෂ්ඨයාගේ දේශපාලනය ගැන කතාකරන්නටයි. දෙමළ සිනමාවේ අසහාය වීරයා කවුදැයි සිනමා රසිකයන් වරු ගණන් වාද විවාද කරගන්නවා. එහෙත් නූතන දෙමළ සිනමාවේ අසහාය දුෂ්ඨයා කවුදැයි කිසිවෙක් විවාද කරන්නේ නැහැ’. දෙමළ, තෙළිඟු, කන්නඩ සිනමා ක්ෂේත්‍රවල අසහාය දුෂ්ඨයා බවට පත්වෙන්නට ඔහුගේ නළු පෞරුෂය හේතුවුණා.
බොලිවුඞ් සිනමාවේත් කිසිදා අමතක නොවන චරිත රඟපාන්නට ඔහු සමත්වුණා. ඔහු අතිවිශිෂ්ඨ දුෂ්ඨයෙක් බව සැබෑවක්, එහෙත් ඉන්දීය ජාතික සම්මානයද දිනූ මේ රංගන ශිල්පියා අති විශිෂ්ඨයෙක් බව කාට හෝ ඔප්පු කරන්නට සිදුවුණොත් පෙන්විය යුත්තේ ඔහු සිනමාවේ දුෂ්ඨයා නොවෙන යහපත් යැයි සම්මත චරිත රඟපෑ අවස්ථා ගැනයි. ඔහු සමාජයේ වෛරයට පාත්‍ර වූ චරිත කෙතරම් නිරූපණය කළද, ප්‍රේක්ෂකයාගේ ආදරය දිනාගන්නා චරිතයක් නිරූපණය කරන මොහොතක සම්පූර්ණයෙන්ම වෙනස් චරිත ලක්ෂණ පෙන්වමින් සුහදශීලී චරිතයකට මාරු වෙන විදියට ඉතාමත් අපූරුයි.
එහෙත් ප්‍රකාශ් රාජ් සොඳුරු මිනිසෙකු බව ඔප්පු කරන්නට නම් ඔහුගේ සිනමා රංගනය සම්පූර්ණයෙන්ම ඉවත් කිරීමත් ප්‍රමාණවත්. සිනමාවේ ඉහළම මිලක් අයකරන, වටිනාම නළුවෙක් වන ප්‍රකාශ් රාජ් වීදි නාට්‍ය 3000කට වඩා රඟපෑ අයෙක් වීමත්, දැවැන්ත සමාජ සුභසාධන වැඩසටහන් ක්‍රියාත්මක කරන්නෙක් වීමත්, 2018 මුල සිට මේ දක්වා ඉන්දියාවේ රජය විවේචනය කරන ප්‍රධානම ඉන්දියානුවෙක් බවට පත්ව සිටීමත් ප්‍රකාශ් රාජ්ගේ වටිනාකම පෙන්වන්නට අවශ්‍ය වෙන පුංචි කාරණා පමණයි.
ඔහු කතාබහ කරද්දී ඔහු කියවා ඇති පොත්පත් ප්‍රමාණය ගැනත්, ලෝකය හා දේශපාලනසය ගැන ඔහුගේ දියුණු අදහස් ගැනත් අවබෝධයක් ගත හැකියි. සිනමාවේ වීරයන්යැයි කියාගන්නා බොහෝ අය මෑත කාලයේදී මතු වූ මීටූ වැනි ව්‍යාපෘති ගැන මුනිවත රකිද්දී, ලිංගික හිංසනයට පත් කාන්තාවන් වෙනුවෙන් ඍජුව කතාකළ පුද්ගලයෙකු ලෙස ප්‍රකාශ් රාජ්ව හැඳින්විය හැකියි.
සිනමාවේ වීරයාගේ ප්‍රතිරූපය රැකගැනීමේ කිසිදු වුවමනාවක් ඔහුට නැහැ. ඉතින්, ඔහු ඍජුව අදහස් පළකරන්නටත් බයවෙන්නේ නැහැ. ඔහු මෑත කාලයක සිට බී.ජේ.පී. ආණ්ඩුවේ හින්දුත්වවාදය මුල් කරගත් දේශපාලනයට විරුද්ධව ප්‍රසිද්ධියේ අදහස් දක්වන්නට පටන්ගන්නේත් ඔහුගේ ඍජු අදහස් දැක්වීම්වල දිගුවක් ලෙසයි. වසර ගණනාවක් තිස්සේ බහු වාර්ගික ඉන්දීය ජාතියක් ලෙස සිටි අය අතර බෙදුම් රේඛා ඇක්‍ෂෙන කාලයක අනාගතය දකිමින් ඍජුව අදහස් දක්වන ශේෂ්ඨ ඉන්දියානු කලාකරුවෙකු ලෙස ඔහුව හැඳින්විය හැකියි.
ඉස්ලාම් අන්තවාදීන්ගේ ත්‍රස්ත ක්‍රියා සමස්ථ මුස්ලිම් ප්‍රජාවගේ ක්‍රියා ලෙස අර්ථකතනය කරමින්, මුස්ලිම්වරුන්ට එරෙහිව හින්දු ජනතාව අතර බිය පැතිරවීමත්, ඒ බියෙන් හින්දු ජනතාව මැතිවරණ දේශපාලනය වෙත සංවිධානගත කිරීමත් බීජේපීයේ ප්‍රධානම දේශපාලන උපක්‍රමයක්ව තිබෙන කාලයක ප්‍රකාශ් රාජ් ඒ අදහස්වලට දැඩිව විරුද්ධ වෙනවා.
ගෞරි ලංකේෂ් නම් බැංගලෝර්හි පුවත්පත් කතුවරිය හා ක්‍රියාකාරිනයව 2017 සැප්තැම්බර් 05 වැනිදා ඇගේ නිවසේදී ඝාතනය කළ අවස්ථාව ප්‍රකාශ් රාජ්ව දේශපාලන අදහස් දැක්වීම්වලට යොමු කළ අවස්ථාව වුණා. ඒ ඝාතනය නූතන ඉන්දීය ඉතිහාසයේ ආන්දෝලනාත්මකම ඝාතනයක් වුණා. ඇයව ඝාතනය කළේ බී.ජේ.පී.යේ හින්දුත්වවාදය ඍජුව විවේචනය කළ නිසා බවට පිළිගත් සැකයක් පවතිනවා, ඇයව ඝාතනය කිරීමෙන් පසුව බී.ජේ.පී.ය විවේචනයට ලක් කළ බොහෝ ඉන්දියානු ක්‍රියාකාරිකයන් බියෙන් නිහඬ වුණා. එහෙත් දේශපාලනය ගැන නිහඬව සිටි ප්‍රකාශ් රාජ් නරේන්ද්‍ර මෝඩි අගමැතිවරයාව ඍජුවම ප්‍රශ්න කරන්නට පටන්ගෙන තිබුණේ ඒ ඝාතනයෙන් පසුවයි.
ප්‍රකාශ් රාජ් ආන්දෝලනාත්මක ලෙස දේශපාලනයට පැමිණියේ 2018 කර්ණාටක ප්‍රාන්ත මැතිවරණයේදීයි. එහිදී ඔහු කිසිම පක්ෂයකට සහාය දැක්වුවේ නැහැ. කිසිම පක්ෂයකින් ඡන්දය ඉල්ලුවේ නැහැ. එමෙන්ම බී.ජේ.පී.ය හැර අන් කිසිදු පක්ෂයක් විවේචනයට ලක් කළේත් නැහැ. ප්‍රකාශ් රාජ් සමාජ මාධ්‍යවල ජස්ට් ආස්කින්‘ නම් හෑෂ්ටැගයෙන් බීජේපීය ප්‍රශ්න කරන්නට පටන්ගෙන තිබුණා.
ඔහු ප්‍රධාන වශයෙන් ප්‍රශ්න කර තිබුණේ ඉන්දියාව සංවර්ධනය ගැන භාරතීය ජනතා පක්ෂය දුන් පොරොන්දු පිළිබඳවයි. ඒවාට සිද්ධවුණේ කුමක්දැයි ඔහු විමසුවා.
එහෙත් එයට ප්‍රතිචාර ලෙස ඉන්දියාව තුළ දැවැන්ත දේශපාලන බලයක් ගොඩනඟාගෙන සිටින බී.ජේ.පී. පක්ෂයේ හිතවතුන්ගෙන් ඔහුට එරෙහිව සමාජ මාධ්‍යවල දැවැන්ත මඩ ප්‍රචාරයක් ගෙනගියා. ඒ මඩ ප්‍රචාරය කෙතරම් දැවැන්ත වුණාදැයි කිවහොත් ඔහු තමන්ගේම බිරිඳ සමඟ නාන තටාකයක සිටින ඡායාරූප කිහිපයක් ඔහු වෙනත් ගැහැණියක ආශ්‍රය කරන බව කියමින් සමාජ මාධ්‍යවල හුවමාරු කරන තැනට පත්වුණා. ඔහුව පාකිස්ථානයට හිතවත් ත්‍රස්තවාදියෙක් ලෙසද නම් කෙරුණා.
ප්‍රකාශ් රාජ්ගේ තියුණු අදහස් දැක්වීම් කෙළින්ම බී.ජේ.පී. පාලනයේ ඉහළට වැදී තිබුණා. ඒ නිසාම ප්‍රකාශ් රාජ් විසින් අපහාස කළ බව කියමින් ඔහුට එරෙහිව නඩු පවරා තිබුණා. කර්ණාටක මැතිවරණය සමයේදී සුබ්‍රමනියම් ස්වාමි නම් බී.ජේ.පී.යේ ප්‍රබල ඇමතිවරයා හා ප්‍රකාශ් රාජ් අතර විවාදයකුත් සූදානම් කර තිබුණා.
ලිබරල්වාදීන් හින්දුත්වවාදයට බය ඇයි?‘ යන්න විවාදයේ මාතෘකාව වුණා. ඉන්පසුව 2019 ඉන්දීය මහමැතිවරණයේදී ස්වාධීන අපේක්ෂකයෙකු ලෙස ඔහු ඉදිරිපත් වුණා. දේශපාලන පක්ෂවල කොටසක් වෙන්න ඔහුගේ කැමැත්තක් නැහැ. ඔහු මැතිවරණයට ඉදිරිපත් වී තිබුණේ තමන්ගේ හඬට වේදිකාවක් තනාගන්නට මිස, මැතිවරණය ජයගැනීමේ අරමුණෙන් නොවෙයි.
ඔබ හින්දුත්වවාදයට එරෙහි මන්දැයි මාධ්‍යවේදියෙක් ප්‍රකාශ් රාජ්ගෙන් විමසූ අවස්ථාවක ඔහු පිළිතුරු දුන්නේ මේ විදියටයි.
‘මම විරුද්ධ වෙන්නේ ආගමකට නෙවෙයි. දෘෂ්ඨිවාදයකට. ඒ තමයි ඔබේ ආගම රාජ්‍යය බවට පත් නොවිය යුතුයි. පාකිස්ථානයට වී තිබෙන දේ බලන්න. ආගමක් රාජ්‍යය බවට පත්වුණාම මොකක්ද වෙන්නේ. ඒ රාජ්‍යය දෙස බලන්න, දුප්පත්කම දෙස බලන්න, ඔවුන් ජීවත්වෙන පීඩාකාරී පසුබිම දෙස බලන්න, ඔබට ඉන්දියාව එවැනි රටක් විය යුතුද. එකම ජාතියක් ජීවත්විය යුතු බව හිතුව හිට්ලර් දෙස බලන්න. ඔහු අදටත් ඉතිරි කර ගිය තුවාල දෙස බලන්න. ඔබ මේ ලෝකයට ඉපදුණු මනුෂ්‍යයෙක්. වෙනස්කම් සමඟ ජීවත්වෙන්න ඉගෙනගන්න. එතැන දැවැන්ත ගස් තියෙනවා. ටිකක් පුංචි ගස් තියෙනවා, බොහෝ පුංචි ගස් තියෙනවා. තවත් බොහෝ දේ මේ හැම දෙයක්ම සාමයෙන් එකට පවතිනවා. සාමයෙන් ජීවත්වෙන්න, මේ ලෝකය විනාශ කරන්න එපා.
මඩ ප්‍රහාරවලට ලක්වීමත්, සිනමාවේ අවස්ථා ගණනාවක් ඔහුට අහිමි වීමත් නිසා වතාවක් මාධ්‍යවේදියෙකු ප්‍රකාශ් රාජ්ගෙන් විමසා තිබුණේ රංගන ශිල්පියෙකු ලෙසම නොසිටියේ මන්ද කියායි.
‘මට මාව නිකන්ම නළුවෙක් විදියට හඳුන්වාගන්න බැහැ. වෙනසක් කළ කෙනෙක් විදියට මාව හඳුන්වාගන්න ඉඩ දෙන්න. ලෝක ඉතිහාසය පුරාවට මෙවැනි කාලවල කලාකරුවන් ඉදිරියට ඇවිත් තමන්ගේ වගකීම ඉටුකරලා තිබෙනවා.
ප්‍රකාශ් රාජ්ගේ තියුණු හා තද ප්‍රශ්නකිරීම් නිසා ඉන්දියාවේ හින්දුත්වවාදී දේශපාලනයේත් අසහාය දුෂ්ඨයා බවට ප්‍රකාශ් රාජ් පත්වෙමින් සිටිනවා. ඒ නිසාම ඔහුව ඝාතනය කිරීමේ ඉඩක් ගැනත් මාධ්‍ය වාර්තා පළ වී තිබෙනවා. එහෙත් මේ යුගය ඉන්දියාවටත් ලංකාවටත් ප්‍රකාශ් රාජ්ලා වැනි දුෂ්ඨයන් වැඩි වැඩියෙන් අවශ්‍ය වී තිබෙන යුගයක් බව පැහැදිළියි.
තරිඳු උඩුවරගෙදර
අනිද්දා
