ලෝකයේ විශා­ල­තම නොනිදන පොත් සල්පිල 05 වැනිදා සිට ලංකාවේ...

සාහිත්‍ය මාසය අවසන් වීමෙන් අනතුරුවද පොත-පත පිළිබඳ උනන්දුවක් දක්වන මෙරට ජනයාට අන්තර්ජාතික පොත් ප්‍රදර්ශනයක නවමු අත්දැකීමක් විඳ ගැනීමේ මහඟු අවස්ථාවක් කියැවීමේ මාසයේදී උදාවීමට නියමිත ය. ඒ ලෝකයේ විශාලතම පොත් සල්පිල වශයෙන් ප්‍රකට Big Bad Wolf (බිග් බෑඩ් වුල්ෆ්) පොත් ප්‍රදර්ශනයේ අත්දැකීම ප්‍රථම වතාවට මෙරටදී මෙමස 5 වැනිදා සිට 15 වැනිදා දක්වා ලේක්හවුස් ඉදිරිපිට ප්‍රදර්ශන හා සම්මේලන මධ්‍යස්ථානයේදී ආරම්භ වීමට නියමිතය වීමය.

එහි ඇති විශේෂත්වය වනුයේ එම ප්‍රදර්ශනය 05 වැනිදා සිට අඛණ්ඩව 15 වැනිදා දක්වා 24 පැයේ ම විවෘතව තැබීමයි.

බිග් බෑඩ් වුල්ෆ් සංකල්පය මෙරටට හඳුන්වා දීමේ නියමුවා වනුයේ නිශාන් වාසලතන්ත්‍රි මහතායි. පොත-පතට කිසිදු සබඳතාවක් නොමැති ක්ෂේත්‍රයක චරිතයක් ලෙස ප්‍රකට නිශාන් මහඟු දායාදයක් බඳු මේ පොත් සල්පිල මෙරට ජනයාට ලබාදීම වෙනුවෙන්ම ProRead Lanka නමින් නව ආයතනයක් බිහිකර ඇත. එහි අධ්‍යක්ෂවරයා ලෙස කටයුතු කරන නිශාන්ගේ අරමුණ මෙරට ජනයා තුළ කියවීමේ රුචිය වර්ධනය කරමින් නැණවත් ගුණවත් පරපුරක් බිහි කිරීමයි.

“ඇත්තටම කිව්වොත් මේක තමයි ලෝකෙ තියෙන ලොකු ම පොත් සල්පිල. මෙහිදී පාඨකයන්ට ඉතා විශාල වට්ටම් සහිතව ලෝකයේ තිබෙන ඉහළ ම ගුණාත්මක අගයකින් යුත් පොත් මිලදී ගත හැකියි. උදාහරණයක් කිව්වොත් රුපියල් 3000ක පොතක් රුපියල් 400ක වගේ මිලකට ගත හැකියි” යැයි පවසන නිශාන් සියයට 80 සිට 60 දක්වා ඉහළ වට්ටමක් මින් ලබාගන්නා පොත්වලට හිමි වන බවද පැවසුවේ ය.

ලෝකයේ සෑම රටක ම පාහේ ප්‍රකාශයට පත් ඉංග්‍රීසි පොත් පමණක් මිලදී ගත හැකි අතර මෙවර ලංකාවේ පැවැත්වෙන සල්පිලට ලක්ෂ පහළොවකට අධික පොත්-පත් සංඛ්‍යාවක් ඉදිරිපත් කිරීමට බලාපොරොත්තු වන බව ද ඔහු පවසයි. 2009 වර්ෂයේදී මැලේසියාවෙන් ආරම්භ වූ බිග් බෑඩ් වුල්ෆ් සල්පිල ඉන්දුනීසියාව සහ තායිලන්තයෙන් පසුව සිවුවන ප්‍රදර්ශනය ලෙස මෙවර ශ්‍රී ලංකාවේදී පැවැත්වේ. එම ප්‍රදර්ශනය ලංකාවට ලබාගැනීමේ කතාන්දරය ද නිශාන් පැවැසීය.

“මේක අහම්බෙන් වූ දෙයක්. මං මැලේසියාවට ගියා ව්‍යාපාරික කටයුත්තක් වෙනුවෙන්. එතෙන්දි මට බිග් බෑඩ් වුල්ෆ් නිර්මාතෘ ඇන්ඩෲ මුණගැසුණා. එදා එයාගේ ආයතනයට ගිය වෙලාවේ මං දැක්කා නිකං සාගරයක් වගේ පොත් ගොඩක්. මං ඇහැව්වා මෙතන මොනවද කරන්නෙ කියලා. ඊට පස්සෙ එතුමා මට මේ දේ ගැන කිව්වා. මං ඇහැව්වා ඇයි මේක ලංකාවට ව්‍යාප්ත කරන්නෙ නැත්තෙ කියලා. ඊට පස්සෙ එතුමා කිව්වා අවස්ථාවක් ලබාදීලා අපට උදවු කළොත් අපි ඕනෑම මොහොතක ඒ සඳහා සූදානම් කියලා. ඊට පස්සෙ මං මගේ ආයතනයෙන් ඒ දේ කරන්න බැරි නිසා... මගේ ආයතනයේ පිරිසත් එකතු කරගෙන ProRead කියන ආයතනය ඒ සඳහා ඇතිකළා. ඒ හරහා තමයි අපි මේ නව සංකල්පය ලංකාවට හඳුන්වා දීමට කටයුතු කළේ.”

එලෙස මෙරටට පැමිණි මේ පොත් සල්පිලෙන් ලාංකිකයන්ට අත්වන ප්‍රතිලාභ ගැනත් කතා කළ නිශාන්,
“ඇත්තටම කිව්වොත් මේක මහා නිධානයක්. ලංකාවේ පාඨකයන්ට ලොකු අවස්ථාවක් මෙයින් උදා වෙනවා, ලෝකයේ තිබෙන ඉතාම විශිෂ්ට ගණයේ ඉංග්‍රීසි පොත් ලබා ගැනීමට. ඉතා දුර්ලභ සීමිත පිටපත් සංඛ්‍යාවලින් යුතු පොතපත එකතු කරන්නන්ට ද මේ අවස්ථාව කදිම අවස්ථාවක්. මෙතෙන්දි සාමාන්‍යයෙන් රුපියල් 3000ක් පමණ වන පොතක් රුපියල් 400කට ගන්න පුළුවන්. එය ම ඇති නේද මෙයින් ලැබෙන ප්‍රතිලාභය වටහාගන්න. ඊට අමතරව ඉතාම ඉහළ ගණයේ ප්‍රින්ටින් කොලිටි පොත්. මොකද අපේ රටේ වැඩිපුරම තියෙන්නෙ ඉන්දියන් ප්‍රින්ටින්. මෙතන ඉන්දියන් ප්‍රින්ටින් පොත් එකක්වත් නැහැ. මෙවැනි කාරණා නිසා මෙය එක් අතකින් බැලුවහොත් ලොකු පින්කමක්. මොකද අද ‘ස්ටාර් වෝස්’ වගේ පොතක් රුපියල් දහ-දොළොස්දාහක් වෙනවා. මෙතෙන්දි එවැනි පොතක් වුණත් රුපියල් 1500කට වගේ ගන්න පුළුවන්. ඒ වගේම ලෝකයේ සෑම රටකම පාහේ එළිදකින පොත් ලක්ෂ 15කට වැඩිය අපි මේ සල්පිලට ගෙන ඒමට බලාපොරොත්තු වෙනවා.”
ලොකු-පොඩි සැමටම සරිලන ආකාරයේ සෑම ක්ෂේත්‍රයක්ම නියෝජනය වන පොත්-පත්වලින් සමන්විත මේ සල්පිලෙන් පාඨකයාට මෙතරම් ලාභයකට පොත් මිලදී ගැනීමට හැකිවන්නේ කෙසේදැයි මා නිශාන්ගෙන් විමසීමි.
“බිග් බෑඩ් පිරිස හා ලොව නන්දෙස සිටින පොත් ප්‍රකාශකයන් අතර නිරතුරුවම සබඳතාව පවතිනවා. ඉතින් පොත් ප්‍රකාශකයන්ට යම් පොතක් ප්‍රකාශ කරන්න ලැබුණ විට ඔවුන් කරන්නෙ බිග් බෑඩ් පිරිසගෙන් විමසනවා එම පොත මොනතරම් පාඨකයා වැලඳගනිද කියා. ඉන් පසුව බිග් බෑඩ් පිරිස එම පොත අධ්‍යයනය කර ප්‍රකාශකයාගෙන් විමසනවා ප්‍රින්ට් කිරීමට බලාපොරොත්තු වන ප්‍රමාණය. ප්‍රකාශකයන් දහදාහක් පැවසුවහොත් පොතේ ගුණාත්මක බව අනුව බිග් බෑඩ් පිරිස පවසනවා, ‘පොත පනස්දාහක් ප්‍රින්ට් කරන්න, හැබැයි ඒ වැඩි පොත් හතළිස්දාහට දෙන්නෙ ප්‍රින්ට් කොස්ට් එක පමණයි’ කියා. ඉතින් එතෙන්දි ප්‍රකාශකයනුත් අනිවාර්යයෙන් කැමැතිනේ තමාගේ ප්‍රකාශනයක් ලෝකෙ වටේ යනවා දකින්න. අන්න ඒ හරහා තමයි මෙවැනි වට්ටම් සහිතව පොත් ලබාදීමට ඔවුන් කටයුතු කරන්නෙ.”

බිග් බෑඩ් වුල්ෆ් සමාජයට ‘ඔන් ලයින්’ හරහාද සාමාජික වීමේ අවස්ථාවක් ඇත. එවැනි සාමාජිකයන් හට සල්පිලෙන් පසුවද තමන් කැමැති ලොව කොතැනක හෝ ප්‍රකාශයට පත්වූ ග්‍රන්ථයක් ඉතාම ඉක්මනින් වට්ටම් සහිතව තම නිවෙසටම ගෙන්වා ගැනීමේ හැකියාවක් ඇත. එවැනි පුළුල් වැඩපිළිවෙළක් සහිත මේ බිග් බෑඩ් වුල්ෆ් සල්පිලෙහි අන්තර්ජාතික අරමුණද ද නිශාන් පැහැදිලි කරන්නට වූයේය.

“මෙහෙමයි මෙයාලට අවශ්‍ය ඉංග්‍රීසි අඩුවෙන් භාවිත වන රටවල මේ සල්පිල පවත්වමින් ඉංග්‍රීසි භාෂාව ප්‍රචලිත කිරීම. එතෙන්දි මෙයාලට කිසිම ලොකු - පොඩි රටක් වැදගත් නෑ. ලබන අවුරුද්දෙ මේ ප්‍රදර්ශනය චීනයේ සහ වියට්නාමයේ පැවැත්වීමට ඔවුන් බලාපොරොත්තු වෙනවා.”

අපේ රටේ පැවැත්වෙන පොත් ප්‍රදර්ශනවල දක්නට ඇති ‘බුක් ස්ටෝල්ස්’ නොමැති මේ සල්පිල තුළදී තමාට අවැසි පොත් කිසිදු අපහසුවකින් තොරව නිදහසේ තෝරා-බේරා ගැනීමට හැකියාව තිබීමත් විශේෂත්වයකි. “අපිට මෙය ලංකාවේ පැවැත්වීමට කතිකා කරගත් මොහොතේ පොඩි ගැටලුවකට මුහුණ පෑමට වූයේ මේ සඳහා ඉඩකඩ මදකම. මං දැක්කා... ඉන්දුනීසියාවල මේ පොත් සල්පිල කළේ වර්ග අඩි ලක්ෂ දෙකක වගේ විශාල ඉඩක.. නමුත් අපිට කරන්න වෙලා තියෙන්නෙ වර්ග අඩි 40000ක වගේ කුඩා ඉඩක.”

ප්‍රදර්ශනයට ලාංකිකයන් කුමනාකාරයෙන් ප්‍රතිචාර දක්වාවිදැයි නිශාන්ගෙන් විමසූ විට...

“අනිවාර්යයෙන්ම මේ අත්දැකීම මෙරට ජනයා වැලඳගත යුතුයි. මේ ගැන හරියටම දැනුවත් වූ විට මිනිස්සු වැල නොකැඩී එයි... ඒ ගැන කිසිදු තර්කයක් නැහැ. ඒකට ඉතින් ඔබලා වැනි මාධ්‍යය ලබාදෙන සේවය බොහෝ අගය කොට සලකනවා. මේක රටට කරන ලොකු සේවයක්. එච්චරයි. ඒ වගේම මෙතන තියෙන කිසිම පොතක් ලංකාවේ බුක් ෂොප් කිසිවකින්වත් ගන්න නැහැ. ඒ නිසා මෙය සියලු ලාංකිකයන්ට ලැබුණ දුර්ලභ අවස්ථාවක්.” නිශාන් අවසානයේ සියලු ලාංකිකයන්ගෙන් ඉල්ලා සිටියේ තමාට අහම්බෙන් ලැබුණ මහඟු අවස්ථාවෙන් නිසි ප්‍රයෝජන ලබාගන්නා ලෙසයි.

- අමිල මලවිසූරිය -