දීපා මෙහ්තා ශ්‍යාම්ගේ “ෆනී බෝයි” සිනමාවට නගයි
ලෝ ප්‍රකට සම්මානනීය ඉන්දියානු-කැනේඩියානු සම්භවයක් ඇති සිනමා තිර රචකාවියක්, අධ්‍යක්ෂවරියක් සහ නිෂ්පාදකවරියක් වන දීපා මෙහ්තාගේ නවතම චිත්‍රපටිය ශ්‍රී ලංකාවේ රූපගත කිරීම නුදුරේම ආරම්භ කිරීමට නියමිතයි. ඇගේ නිර්මාණ වන ෆයර් (Fire), අර්ත් (Earth), වෝටර් (Water) සිනමාපට ත්‍රිත්වයේ වෝටර් (Water) චිත්‍රපටියද, ඉන් පසු මිඩ් නයිට්ස් චිල්ඩ්රන් (Midnight's Children) රූගත කෙරුනේ ශ්‍රී ලංකාවේදීයි. නමුත් ඇගේ මීළඟ චිත්‍රපටිය අපට වැදගත් වන්නේ එය ශ්‍රී ලංකාවේ රූගත කරන නිසා පමණක් නොවේ. විශේෂයෙන්ම එයට පාදක කරගෙන ඇති කතාව හේතුවෙනුයි. සම්මානනීය ශ්‍රී ලාංකික ලේඛක ශ්‍යාම් සෙල්වදුරෙයිගේ ෆනි බෝයි (Funny Boy) නවකතාව දීපා මෙහ්තා ගේ නවතම චිත්‍රපටියට පාදක වෙනවා. චිත්‍රපටියේ නමද 'ෆනි බෝයි' ලෙසයි නම් කර ඇත්තේ.
ෆනි බෝයි (Funny Boy) නවකතාව 1994දී ශ්‍යාම් විසින් එලි දැක්වූ නවකතාවක් වන අතර එය සුගතපාල ද සිල්වා විසින් 'අමුතු ඉලන්දාරියා' ලෙස පරිවර්තනය කළා. නවකතාවට වස්තු බීජ වන්නේ කොළඹ ධනවත් දෙමළ පවුලක සමකාමී පිරිමි ළමයෙකු පිළිබඳ කතා හයක ස්වරූපයෙන් වයස අවුරුදු හතත් දහහතරත් අතර ඔහු සිය ලිංගික අනන්‍යතාවය ගවේෂණය කිරීම හා 1983 කළු ජූලිය හා සම්බන්ධවයි. ශ්‍රී ලංකාවේ ඉපිද හැදී වැඩෙන ශ්‍යාම් සෙල්වදුරෙයි 1983 ඇති වූ ජාතිවාදී කෝලාහල හේතුවෙන් සිය පවුල සමඟ කැනඩාවට සංක්‍රමණය වී දැන් නැවත ශ්‍රී ලංකාවේ වාසය කරනවා. ලිංගිකත්ව, ජනවාර්ගිකත්ව සහ පන්ති අරගලය පිලිබඳ වියුක්ත ලෙස කතා කරන ෆනි බෝයි නව කතාව දීපා මෙහ්තා සදහන් කරන ආකාරයට ඇගේ ප්‍රියතම නවකතාවක්. සල්මාන් රුෂ්ඩිගේ මිඩ් නයිට්ස් චිල්ඩ්රන් (Midnight's Children) සහ ක්‍රැකින් ඉන්දියා (Cracking India) වැනි පොත් කිහිපයක් චිත්‍රපටිවලට පෙරළා ඇති ඇයගේ මෙම චිත්‍රපටියද ශාස්ත්‍රීය කලාවෙන් අනූන වනු ඇත.
උපුටා ගැනීම : දේදුනු සංවාද
2019 අගෝස්තු 16
