ජනප්‍රිය රංගන ශිල්පී නැසී ගිය විජය කුමාරතුංගයන්ගේ හැත්තෑදෙවැනි උපන්දින සංවත්සරය නිමිත්තෙන් “සත්සරයි - පින්සලයි” ගීත ප්‍රසංගය එළැඹෙන 07 වැනිදා එනම් හෙට දින කිරිබත්ගොඩ වයි.එම්.බී.ඒ. රංග ශාලාවේදී පැවැත්වීමට නියමිතය.
ප්‍රසංගයේ සංවිධාන කටයුතු විජය කුමාරතුංග අනුස්මරණ සහෘද කලා සංසදය විසින් සිදු කෙරේ.
2014 වසරේදී විජය ගී තරුව ලෙස අනුශූරතාව දිනාගත් ප්‍රවීණ චිත්‍ර ශිල්පී ජානක ඉලුක්කුඹුර සමඟ සුසංයෝගීව පවත්වනු ලබන ගීත ප්‍රසංගය සඳහා ආරාධිත ගායන ශිල්පිනිය වශයෙන් විශාරද කෝශිලා වනසිංහ සමඟ දිස්නි නාකන්දල ගායනයෙන් සහභාගි වනු ඇත.
ප්‍රසංගය වර්ණවත් කිරීමට විජය කුමාරතුංගගේ සොහොයුරිය රූපා කුමාරතුංග සමඟ ක්ලීටස් මෙන්ඩිස්, ශ්‍රියාණි අමරසේන යන ප්‍රවීණ සිනමා ශිල්පීන් සමඟ ජනප්‍රිය නළු විශ්ව කොඩිකාරද එක් වීමට නියමිතය.
ප්‍රසංගයේ සංගීත අධ්‍යක්ෂණය සම්පත් හෙට්ටිආරච්චිගේ අතිනි.
නොමිලේ පැවැත්වෙන මේ ප්‍රසංගය නැරැඹීමට විජය කුමාරතුංග අනුස්මරණ සහෘද කලා සංසදයේ ප්‍රධාන ලේකම් අනුර රාජපක්ෂ විවෘත ආරාධනාවක් කර සිටියි.
