මෑතකදී රුපවාහිනි විකාශය ආරම්භ කරමින් ප්‍රේක්ෂක ජනතාව අතරේ වඩාත් ජනප්‍රියත්වයට පත් කුඹියෝ ටෙලි මාලාව IMDB ශ්‍රේණිගත කිරීම්වල එක් අංශයකින් අංක එකට පැමිණීමට සමත්ව තිබෙනවා.

අපරාධ ගණයට අයත් වන ටෙලි මාලාවන් 4481 ක් අතුරින් ප්‍රථම ස්ථානය පැමිණීමට ඔවුන්ට හැකියාව ලැබී ඇත්තේ මනාප 1310 ක් සහ 9.9/10 IMDB අගයක්(rate) ලබා ගනිමින්.

මෙම ශ්‍රේණිගත කිරීම්වල දෙවැනි ස්ථානය හිමිවී තිබෙන බ්‍රේකින් බෑඩ් ටෙලි මාලාව ඡන්ද 1,028,337 ක් සහ 9.5/10 අගයක් ලබා ගෙන තිබෙනවා.

ඒ අනුව කුඹියෝ අංක එකට පැමිණ ඇත්තේ සංඛ්‍යාත්මක වශයෙන් අවම මනාප ප්‍රමාණයකින් වුව ඉහලම ප්‍රේක්ෂක ඇගයීමක් ලබා ගනිමින් බව පැහැදිලි වේ.

IMDB, නැතිනම් ඉන්ටර්නෙට් මුවි ඩේටා බේස් යනුවෙන් හඳුන්වන්නේ ලොව පුරා විකාශය ආරම්භ කළ ආරම්භ කිරීමට නියමිත සිනමාපට, ටෙලිමාලා, වීඩියෝ ගේම් හි රංගන ශිල්පින්, නිෂ්පාදක අංශය, ප්‍රබන්ධ චරිත, තිර පිටපතේ සාරාංශය ඇතුළු තොරතුරු සියල්ල අඩංගු සහ ඒ අනුව විවිධ ශ්‍රේණිගත කිරීම් සිදු කෙරෙන නිරතුරුව යාවත්කාලින කෙරෙන වෙබ් අඩවියකි.

සාමාජිකත්වය හිමි ඕනෑම පුද්ගලයකු හට මෙම වෙබ් අඩවිය වෙත පිවිස එහි අඩංගු සිනමාපටයක්, ටෙලිමාලාවක් හෝ වීඩියෝ ගේම් එකක් සඳහා අගය කිරීමක් ලබා දිය හැකිය.

මෙම වෙබ් අඩවියේ සාමාජිකත්වය හිමි පිරිස මේ වන විට මිලියන 80 කට ආසන්නය.