ඇමෙරිකානු රූ රැජින තරගාවලියට සහභාගි වූ තරුණියන්ට නිගා දෙන ආකාරයෙන් අදහස් පළ කරමින් යවන ලද ඊමේල් පණිවුඩ කිහිපයක් අනාවරණය වීමෙන් අනතුරුව 'මිස් ඇමෙරිකා' සංවිධානයේ ප්‍රධාන විධායක නිලධාරියා සිය පදවියෙන් ඉල්ලා අස් වී තිබේ.

සෑම් හස්කල්ගේ (Sam Haskell) ඉල්ලා අස්වීම වහාම පිළිගන්නා බව Miss America Organization සඳහන් කළේය.

ඔහුගේ ඉල්ලා අස් වීම නිවේදනය කෙරුණේ ඔහුගේ සේවය තාවකාලිකව අත්හිටුවන බවට සංවිධානය නිවේදනය කිරීමෙන් පැය කිහිපයකට පසුවය.

සිය සංවිධානයේ තවත් විධායක නිලධාරීන් දෙදෙනෙකු ද පදවියෙන් ඉවත්ව යන බවත් එහි සභාපතිනි ලින් වෙයිඩ්නර් (Lynn Weidner) සඳහන් කළාය.

ඇය ද සිය ඉල්ලා අස්වීම භාර දී තිබෙන නමුත් නව නායකත්වයක් තෝරා ගන්නා තුරු තාවකාලිකව රැඳී සිටීමට ඇය එකඟ වී තිබේ.

අතීතයේදී ඇමෙරිකානු රෑ රැජින තරගයෙන් ජයග්‍රහණය කළ කාන්තාවන් පිළිබඳව අසභ්‍ය අදහස් සහ ඔවුන්ගේ ලිංගික ජීවිතය පිළිබඳ අපහාසාත්මක කරුණු එම ඊමේල් පණිවුඩවල අඩංගු වී තිබුණ බව විශ්වාස කෙරේ.

මතුව තිබෙන තත්වය හමුවේ සංවිධානයේ සභාපති සහ ප්‍රධාන මෙහෙයුම් නිලධාරී ජොෂ් රැන්ඩල් (Josh Randle) ද ඉල්ලා අස් වූ බව එහි ප්‍රකාශකයෙක් බීබීසී යට තහවුරු කළේය.

මේ අතර අධ්‍යක්ෂ මණ්ඩලයේ සාමාජිකයෙකු වූ ටැමි හැඩාඩ් (Tammy Haddad) සිකුරාදා (දෙසැම්බර් 22) ඉල්ලා අස් විය.

තරගයට සහභාගි වන රූ රැජිනන් පිළිබඳව තෙවසරක් මුළුල්ලේ සෑම් හස්කල් සහ සංවිධානයේ අනෙක් නිලධාරීන් අතර හුවමාරු වූ ඊමේල් පණිවුඩ Huffington Post වෙබ් අඩවිය විසින් අනාවරණය කර තිබුණි.

ඒ සමගම පදවියෙන් ඉල්ලා අස් වන මෙන් රූ රැජින තරගයෙන් ජයගත් 49 දෙනෙකු විවෘත ලිපියකින් ප්‍රධාන විධායක නිලධාරියාගෙන් ඉල්ලීමක් කර තිබුණි.

ඇතැම් ඊමේල් පණිවුඩවල නම සඳහන් වූ හිටපු ඇමෙරිකානු රූප රාජිනියක වන මැලෝරි හැගන් (Mallory Hagan) මේ අතර කියා සිටියේ එවැන්නක් සිදුවෙමින් පවතින බව තමන්ට සමීප බොහෝ දෙනාට ඒත්තු ගැන්වීමට තමන් කලක් මුළුල්ලේම උත්සාහ කළ බවය.

(බීබීසී සංදේශය)