ප්‍රකට ගායන ශිල්පී ස්කොට් වෝකර් දිවියෙන් සමුගනියි
රොක් සංගීත ඉතිහාසයේ වඩාත් ප්‍රබල චරිතයක් ලෙස හැඳින්වුණු ගායන ශිල්පී සහ පද රචක ස්කොට් වෝකර් අභාවප්‍රාප්ත වී තිබේ.
මියයන විට ඔහුගේ වයස අවුරුදු 76කි.
වයස අවුරුදු 19 දී වෝකර් බ්‍රදර්ස් සංගීත කණ්ඩායම සමඟින් එක් වූ මේ ඇමරිකානු සම්භවයක් සහිත බ්‍රිතාන්‍ය ගායන ශිල්පියා The Sun Ain't Gonna Shine Anymore, Make It Easy On Yourself වැනි ගීත ඔස්සේ රසික ආදරය දිනා ගත්තේ ය.
ඉන්පසු තනිව සංගීත ගමන් මගක් ඇරඹු ස්කොට් සංගීත ඇල්බම ගණනාවක් එළිදැක්වූයේ ය. Scott , Bish Bosch, Soused, The Drift, Tilt වැනි ඔහුගේ පර්යේෂණාත්මක සංගීත ඇල්බමයන් ආදරයේ, ලිංගිකත්වයේ සහ මරණයේ සංකීර්ණතා ස්පර්ශ කළ නිර්මාණයන් ලෙස හැඳින්විය හැකි ය.
ලොව පුරා වෙසෙන කලාකරුවන් සහ රසිකයින් ඔහුගේ අභාවය පිළිබඳ ශෝකය පළ කර තිබේ.
