සාක් සිනමා උළෙල ජූලි 2 වැනිදා ආරම්භ කෙරේ

පාස්කු ඉරුදින ප්‍රහාර නිසා රටේ ඇති වූ තත්වය මත කල් ගිය සාක් සිනමා උළෙල ජූලි 2 වැනිදා ආරම්භ කිරීමට නියමිත බව සාක් සංස්කෘතික මධ්‍යස්ථානය නිවේදනය කර තිබේ.

9 වැනි වරට සංවිධාන කරන මෙම උළෙල ජූලි 7 වැනිදා දක්වා ජාතික චිත්‍රපට සංස්ථාවේ දී පැවැත්වේ.

ඒ අනුව සමාරම්භක උත්සවය එළඹෙන මස 2 වැනිදා පස්වරු 5ට චිත්‍රපට සංස්ථා සිනමා ශාලාවේ දීත්, සිනමා වැඩමුළුවක් ජූලි 4 වැනිදා උදැසන 9ට කොළඹ සිනමා සහ රූපවාහිනී ඇකඩමියේ දීත්, සිනමා සම්මාන උළෙල සහ සමාප්ති උත්සවය ජූලි 7 වැනිදා පස්වරු 5ට චිත්‍රපට සංස්ථා සිනමා ශාලාවේ දීත් සිදු කිරීමට නියමිත ය.  

ඉන්දියාව, පකිස්ථානය, බංග්ලාදේශය, මාලදිවයින, භූතානය, ඇෆ්ගනිස්ථානය, නේපාලය සහ ශ්‍රී ලංකාව  යන සාක් කලාපිය රටවල විශිෂ්ට චිත්‍රපට සහ කෙටි චිත්‍රපට රැසක් සාක් සිනමා උළෙලේ දී නොමිලේ ප්‍රදර්ශනය කෙරෙන අතර ඒ පිළිබඳ වැඩිදුර විස්තර දැනගැනීම සඳහා මිරර් ආට්ස් වෙබ් අඩවිය සමඟින් දිගටම රැඳී සිටින්න.