කේසවරාජ්ගේ “පනෙයිමරක්කාඩු” ජූලි 3 ජර්මානු සංස්කෘතික මධ්‍යස්ථානයට...
ජර්මානු සංස්කෘතික මධ්‍යස්ථානයේ මාසිකව පැවැත්වෙන සිනමා දැක්ම සහ සංවාදයේ ජූලි ප්‍රදර්ශනය සඳහා කේසවරාජ් නවරත්නම්ගේ “පනෙයිමරක්කාඩු”(The Palmyrah Grove) සිනමාකෘතිය තිරගත කිරීමට කටයුතු සුදානම් කර තිබේ.
චිත්‍රපටය ප්‍රදර්ශනය කෙරෙනුයේ ජූලි 3 වැනිදා සවස 6 ට කොළඹ ජර්මානු සංස්කෘතික මධ්‍යස්ථානයේ දී ය.
එදින සිනමා සංවාදය අනෝමා රාජකරුණා විසිනි.
“#Panaimarakkaduමේ චිත්‍රපටය කෙසේ හෝ උතුරෙන් එළියට රැගෙන ඒම කේසවරාජන් ට වගේම චිත්‍රපටය සදහා කැප වුණු අය වගේම මේ සිනමාවට ආදරය කළ බොහෝ දෙනෙකුට තිබුණු උනන්දුවක්. 2010 දී නිෂ්පාදන කටයුතු ආරම්භ කර රූගත කිරීම්, සංගීත නිර්මාණයන් වැනි කොටස් තරමකින් අවසන් කර තිබු මොහොතක මෙම චිත්‍රපටය විවිධ ගැටළු මත නතර වෙනවා. නැවත යම් සංශෝදන ඇතුලත් අලුතින් තිර රචනයක් (2014) වගේම නළු නිළියන් පවා අළුතින් ම සොයා නැවත රූපගත කෙරෙනවා. කෙසේ හෝ කේසවරාජන් මේ කියන්න උත්සාහ ගන්න උතුර ඔහුට යම් යම් බාධක මැද කියා අවසන් කරන්න පුළුවන් වෙන්නෙ 2017 සැප්තැම්බර් මාසයේ. ඒ යාපනය ජාත්‍යන්තර සිනමා උළෙලේ.
උතුර ගැන උතුරට පමණක් නොවී අනෙකුත් ප්‍රදේශ වල ජීවත් වන්නන්ටත් මේ කතාව කියන්න ඕන. මෙහෙම හිතපු කේසවරාජන් ට චිත්‍රපටයක් හදන්න ඔහු විඳි දුකටත් වඩා එය තිරගත කරන්න අධික දුකක් විඳින්න සිද්ධ වුණා. කෙසේ හෝ 2018 වර්ෂයේ මේ චිත්‍රපටිය කොළඹට ගේන්න සිනමාවට ආදරය කළ බොහෝ දෙනෙක් උත්සාහ කළා. තිරගත වීමට නියමිතව තිබු දවසේ අවසන් පැයක දී පවා කේසවරාජන් සහ සිනමාවට ආදරය කළ කිහිපදෙනෙක්ම චිත්‍රපට සංස්ථාවේ එහාටයි මෙහාටයි ඇවිදගෙන හිටියේ කෙසේ හෝ චිත්‍රපටය පෙන්වීමේ අවසන් තප්පර කිහිපයකටත් බලාපොරොත්තුවක් තිබූ නිසා. චිත්‍රපට සංස්ථාවේ එදා හිටපු අධ්‍යක්ෂවරයාට සහ තවත් කාර්යමණ්ඩලයේ කිහිපදෙනෙකුට ම දැඩි උනන්දුවක් සහ මේ ගැන ආදරයක් තිබුන කෙසේ හෝ චිත්‍රපටය පෙන්වන්න. ඒත් අවසන් පැය තුළදී ඉල්ලූ ඉල්ලීම් සියල්ල කිසිඳු පදනමක් නොමැති වුවද කේසවරාජන් ඇතුළු සියලු දෙනා සිදු කිරීමට පොරොන්දු වී අනුමැතිය සඳහා බලා සිටියා. එහෙත් අවසන් වරටත් (පැයක් තිබියදී) මේ චිත්‍රපටය සඳහා අනුමැතිය ලැබුණේ නැහැ. මේ අනුමැතිය ලබා නොදෙන බව චිත්‍රපට නිෂ්පාදන අංශයෙන් අවසන් වරට දැනුම් දුන්නා. ඒ සියලු දෙනා එකතු වී ඔවුන් ඉල්ලූ සියල්ලත් සිදු කර අන්තිම පහළ තත්වයට පැමිණියාටත් පසුව. චිත්‍රපටය ලියාපදිංචි කර තිබු නම පවා ගැටළුවක් බවට පත් වුණා චිත්‍රපටයේ නිෂ්පාදන අංශයට. සියලු බලාපොරොත්තු නැතිව ගිය තැන අනෙක් සැම දෙනාගේ මුහුණු දකිනවාටත් වඩා ඇත්තෙන්ම කේසවරාජන්ගේ මුහුණ මට බලන් ඉන්න බැරි වුණා. ඔහුගේ ඇස් හොඳටම තෙමිලයි තිබුණේ. මට මේ ගැන මතක් කරන විට දැනෙන හැගීම... චිත්‍රපටයක් පෙන්වන්න මෙච්චර දුකක් විදින අධ්‍යක්‍ෂවරයෙක්.
කෙසේ නමුත් අවසන් පැය තුළ චිත්‍රපටය පෙන්වන්නේ නැති බව සඳහන් කර දැන්වීම අලවන්න අපි සුදානම් වන විටත් දෙමළ සිනමාවට ආදරය කරන කොළඹ පමණක් නොව දුර සිට පවා ඇතැම් දෙනෙක් එතැනට ඇවිත්. ඔවුන් ඇසු ප්‍රශ්න වලිනුත් අපිට දැනුණේ මේ චිත්‍රපටය බලන්න ඔවුන්ට තිබෙන වුවමනාව ගැන පමණයි. චිත්‍රපටයේ සංවාදය සඳහා අශෝක හඳගම මහතා සහ මන්නාරමේ සිට ඇසක් අහිමි, අතක් අහිමි නිරන්තරයෙන් ලේඛනයේ යෙදුණු සහ යෙදෙමින් සිටිනා විශිෂ්ට ලේඛිකාවක් වන වෙට්‍රිචෙල්වී සහෝදරියත් ඇවිත් හිටියා. ඒ වගේම සමාජ මාධ්‍ය තුළ වෙනත් චිත්‍රපටයකටත් වඩා මේ ගැන සඳහන් කර බොහෝ දෙනෙක් මේ චිත්‍රපටය ගැන තොරතුරු බෙදා හැරියා. ඒත් මේ චිත්‍රපටය බලන්න පුළුවන් වුනේ නැහැ.
අවුරුද්දක් වැනි කාලයක් තුල මේ නිෂ්පාදානම ය ගැටලුව විසදාගන්න කේසවරාජන් වගේම චිත්‍රපටයේ රඟ පෑ නළු නිලියෝ පවා විශාල උත්සාහයක නිරත වුණා.
ඉතින් මේ හැමෝම සොයපු Panaimarakkadu වෘතාන්තය ඔබ ට පෙන්වන්න නැවත වරක් කේසවරාජන් එනවා. ජූලි මස 03 වන දින ගොතේ ආයතනයේ තිරගත වීමට තිබෙන මෙම චිත්‍රපටය පෙන්වන්න උත්සාහ කළ හැමෝටම ආදරෙයි.
කෙසේ හෝ “චිත්‍රපටයක් බැලීම මිනිසුන්ගේ අයිතියක්” අපි එය පිළිගත යුතුමයි.”
-අනුෂා සිවලිංගම්-
