ශ්‍යාම් ප්‍රනාන්දු ඉන්දීය සිනමාවේදී මනි රත්නම්ගේ අලුත්ම චිත්‍රපටයේ රංගනයට
සම්මානිත ප්‍රවීන රංගන ශිල්පී ශ්‍යාම් ප්‍රනාන්දු ඉන්දීය සිනමාපටයක් සඳහා සිය රංගන දායකත්වය ලබා දීමට නියමිත බව වාර්තා වේ.
ප්‍රකට සිනමාකරු මනි රත්නම්ගේ නවතම චිත්‍රපටය වන “පොන්නියන් සෙල්වම්” සඳහා යි ඔහු මෙසේ රංගන දායකත්වය සැපයීමට නියමිත වන්නේ.
ඒ අනුව තායිලන්තයේ පැවැත්වෙන රූගත කිරීම්වලට සහභාගී වීමට දිවයිනෙන් පිටත්ව යන බව සඳහන් කරමින් සිය ෆේස්බුක් ගිණුමෙහි සටහනක් තැබීමට ශ්‍යාම් අමතක කර තිබුනේ නැහැ.
කොලිවුඩ් තරු ජයම් රවී, කාර්ති සහ අයිශ්වර්යා ලක්ෂ්මි මේ වනවිට “පොන්නියන් සෙල්වම්” සිනමාපටයේ රංගනයට එක්වී ඇති අතර වික්‍රම්, ට්‍රිෂා, මෝහන් රාමන් සහ ප්‍රකට බොලිවුඩ් රංගන ශිල්පිනි අයිශ්වර්යා රායි එළඹෙන වසරේ දී සිනමාපටය සමඟ එක්වීමට නියමිත බව ඉන්දීය මාධ්‍ය වාර්තා කර තිබෙනවා.
“පොන්නියන් සෙල්වම්” නම් දමිල නවකතාව ඇසුරින් නිර්මාණය කෙරෙන මෙම සිනමාපටයේ සංගීත ඒ.ආර්. රහමන් විසිනි.
ඉන්දීය සිනමාවේ දැවැන්තයකු අතින් නිර්මාණය කෙරෙන සිනමාපටයක් සඳහා රංගනයෙන් එක්වීමට අවස්ථාව ලද ප්‍රවීන රංගන ශිල්පී ශ්‍යාම් ප්‍රනාන්දුට මිරර් ආර්ට්ස් අපගේ උණුසුම් සුබ පැතුම්!
