අසහාය සාහිත්‍යධර කේ. ජයතිලකයන්ගේ 'චරිත තුනක්' නවකතාව ඇසුරින් නිර්මාණය කෙරුණු 'චරිත තුනක්' නාට්‍යයේ 'ඉසා' චරිතයට පණ දෙමින් ලාංකික ජන මනස තුළ සදාතන සැමරුමක් වන ජ්‍යෙෂ්ඨ නළු සුමින්ද සිරිසේන අද (04) සිය දිවිසැරිය නිම කළේය.

අභාවප්‍රප්ත වන විට 75 වැනි වියේ පසු වූ ඒ මහතා ආසන්න වසර කිහිපයේදී රෝගාතුරව පසු විය.
ඉතා පුළුල් පරාසයක රඟපෑම් කිරීමේ ලා ප්‍රමුඛ නළුවෙකු වන සුමින්ද සිරිසේන මහතා බොහෝ සම්මාන උළෙලවල 'හොඳම' සම්මාන ලැබූ කලාකරුවෙකි.
සුමින්ද සිරිසේන මහතා කෑගල්ල බොස්සැල්ලේ 1948දී ජූලි 4 වැනිදා උපත ලැබූ අතර ඔහුගේ පියා ශ්‍රී ලාංකේය සම්ප්‍රදායික ජන නාට්‍ය ඉදිරිපත් කළ ගමේ කුඩා ව්‍යාපාරිකයකු වූ බුලත්ගමුව සිරිසේන වේ. පුස්සැල්ලාව මහා විද්‍යාලය සහ තෝලංගමුව මධ්‍ය මහා විද්‍යාලයේ ආදි ශිෂ්‍යයෙකු වූ ඔහු කලා ශිල්පියෙකු මෙන්ම සක්‍රීය දේශපාලන භාවිතාවකින්ද සමන්විත පුරවැසියෙකු වේ.
විශේෂවේදී උපාධිධාරියෙකු වන සිරිසේන මහතාගේ බිරිඳ ලීලා සිරිසේන වන අතර ඔහු දෙදරු පියෙකි.
2012 මැයි මාසයේදී තදබල ලෙස අසනීප වීමත් සමග කලා කටයුතුවලින් ඈත් වූවද සිය පළමු වකවානුවේ රඟ දැක්වූ චරිතවලින් පවා රසික හදවත් දිනූ නළුවෙකු වේ.