විෂ්ණු වාසු යනු ශ්‍රී ලංකාවේ ලේඛකයෙකු වන අතර ඔහු විසින් 'සාරි ඇඳපු පිරිමි' සිය නවකතාව මේ දෙසැම්බර 20 වැනි බදාදා එළිදැක්වීමට නියමිතය.

සාහිත්‍ය ලැදි බොහොමයක් දෙනෙකු විසින් සුබ පතනු ලැබ තිබූ මෙම නවකතාව මේ මාසයේදී සරසවි ප්‍රකාශන වෙතින් මිලදීගත හැකිය.

සවස 4 සිට 6 දක්වා නුගේගොඩ, විජේරාම හන්දියේ, රෝයල් තැප්‍රොබේනියන් කලාගාරයේදී නවකතාව එළිදැක්වීම සිදු කෙරේන අතර විවෘත මයික්‍රෆෝනයකින් පොතේ කැමති තැනකින් ඕනාම කෙනෙකුට කියවීමේ අවස්ථාව සලසා දී තිබේ.

“මංගලිකා... අර ජැෆ්නා වලිං ආව බෝයි හරි ස්වීට් නේද?” උත්තරා රෑට බතට කැකුළු හාල් ලිපේ තියන ගමන් පොඩි කථාවකට මුල පිරුවා.
“පවු අනේ එයා. මට හිතෙනවා නිවාඩු වෙලාවට එයාට සිංහල ටිකක් උගන්වන්න.”
“එයාට සිංහල උගන්වන්න උඹට දෙමළ දන්නවද?”
“ඇයි නැත්තේ. මං දෙමළ ගං දෙකකට මැදිවෙලා හැදුනු වැඩුනු මහාමයිලංකුලමේ කෙල්ලක්. යුද්දේ කාලේ ඒ මිනිස්සුන්ගේ ඔත්තු නිසා අපි අනන්ත වතාවක් ජීවිත බේරාගෙන තියෙනවා උත්තරා.”
“මං දැනං හිටියානං උඹ දෙමළ දන්නවා කියලා අපි දෙන්නගේ රහස් දෙමළෙන් දොඩන්න තිබුනා.” උත්තරා සිනා සිසී කිව්වා.
“උඹ කොහොමද දෙමළ දන්නේ?”
“මමත් උඹ වගේම තමයි මංගලිකා. මං ගම්පොල මරියාවත්තේ. වටේටම මුස්ලිම් ගෙවල්. මරියාවත්තට ඒ පැත්තේ සමහර මිනිස්සු කියන්නේ මරක්කල ගුහාව කියලා. අපි ජීවත් වුනේ එකට. එක පවුලක් වාගේ. මගේ කොටහළු මංගල්ලේ දවසේ ගමටම බිරියානි බෙදුවේ අන්සාර් මාමා. විභාගේ පේල් වෙච්ච දවසේ අම්මගෙන් සබ්බුව වදියි කියලා මාව රක්සා කළේ නජීමා ආච්චි. මරක්කලයෝ කියන්නේ අපේ ජීවිතවල කොටස්කාරයෝ මංගලිකා.”

සාරි ඇඳපු පිරිමි
විෂ්ණු වාසු