ආදරවන්තයින්ගේ දිනයේ රිදී තිරයට එන “ගලී බෝයි” පූර්ව ප්‍රචාරක පටය එළිදකියි
සෝයා අක්තර්ගේ නවතම සිනමා අධ්‍යක්ෂණය “ගලී බෝයි” හි නිළ පූර්ව ප්‍රචාරක පටය අන්තර්ජාලයට නිකුත් කර තිබෙනවා.
රැප් ගායකන් දෙදෙනකු වන Divine සහ Naezyගේ ජිවිත කතාව, ඔවුන් මුම්බායි නුවර වීදිවල සිට ජනප්‍රියත්වයේ මුදුනට ආ ගමන් මග පාදක කරගත් මෙම සිනමාපටයේ ප්‍රධාන චරිතයට පණ පොවන්නේ සුපිරි බොලිවුඩ් නළු රන්විර් සිං ය. ආලියා භාත් ප්‍රධාන නිළි චරිතය රඟ දක්වයි.
කල්කි කොච්ලින්, විජේ වර්මා, සිද්ධාන්ත් චතුර්වේදී, විජේ රාස්, අමෘතා සුභාෂ්, විවියන් ෆර්නැන්ඩ්ස් ඇතුළු විශාල පිරිසක් මේ සඳහා රංගන දායකත්වය සපයා තිබෙනවා.
මෑතකදී නිකුත්වූ, මේ වනවිට ඉහල ප්‍රේක්ෂක ප්‍රතිචාර ලබන රන්විර්ගේ “සිම්බා” චිත්‍රපටය සේම මෙම සිනමාපටය ද ආදායම් වාර්තා තබනු ඇති බවට විචාරකයින් මත පළ කර ඇති අතර පූර්ව ප්‍රචාරක පටය නිකුත් කිරීමෙන් පැය කිහිපයකට පසු මේ ආකාරයෙන් ප්‍රතිචාර ලැබීම විශේෂත්වයක් බවයි ඉන්දීය මාධ්‍ය වාර්තා කරන්නේ.
ඔබේ කාලය පැමිණේවි යන පාඨය රැගත් “ගලී බෝයි” ආදරවන්තයින්ගේ දිනයේ දී එනම් පෙබරවාරි 14 වැනිදා ඉන්දියාවේ එළිදැක්වීමට නියමිත යි.
