ප්‍රියංකා ඉටි රුවක් වෙයි
පසුගිය කාලය පුරාවට පුවත් මැවූ ජනප්‍රිය බොලිවුඩ් රංගන ශිල්පිනි ප්‍රියංකා චොප්රා ඉටි රුවක් වී ඇති බව ඉන්දීය මාධ්‍ය වාර්තා කරනවා.
එහි සැබෑ කතාව නම්, ඇයගේ රුවට සමාන ඉටි රුවක් පසුගියදා ඇමරිකාවේ නිව්යෝක් නුවර මදාම් තුසෙද් කෞතුකාගාරයේ දී එළිදැක්වීමයි.
ප්‍රියංකාගේ ඉටිරුවක් නිර්මාණය කිරීම සඳහා අවශ්‍ය මිනුම් ලබාගත් බව මිට මාස 6 කට පමණ ඉහතදී විදෙස් මාධ්‍ය වාර්තා කර තිබුණා.
ඒ අනුව නිර්මාණය කළ මෙම ඉටිරුව එළිදැක්වීම සඳහා පසුගිය දිනක ඇය මදාම් තුසෙද් කෞතුකාගාරයට ගොස් තිබූ අතර එහිදී ගත් ඡායාරුප සිය ඉන්ස්ටග්‍රෑම් සමාජ මාධ්‍යයෙහි ද පල කර තිබුණා.
එක්සත් රාජධානිය, ඔස්ට්‍රේලියාව සහ ආසියාවේ පිහිටි මදාම් තුසෙද් කෞතුකාගාරවල ද තමාගේ ඉටි රූප එළිදකිනු ඇති බවයි ප්‍රියංකා එහිදී සඳහන් කළේ.
