සංහිඳියාවක් අවශ්‍ය වන්නේ බො‌හෝ විට බහුතරයක් විසින් සුළුතරය පීඩනයට පත් කොට ඇති අවස්ථාවක් බව වටහා නොගෙන සංහිඳියාවට පිලියම් සෙවිය නොහැකි බවයි සමකාමී අයිතීන් වෙනුවෙන් පෙනී සිටින නීතිවේදියෙක් හා චිත්‍රපට අධ්‍යක්ෂවරයෙක් පවසන්නේ.
ජාතීන් අතර සංහිඳියාව ඇති කිරීමට ඉදිරිපත් කරන ලද රාමුවක් තුළ ලිංගික සුළුතරයකගේ ප්‍රශ්ණය ගැන කතා කරන්න යොදා ගැනීම උචිත නැති බව ඇතැමුන් තර්ක කලද ලංකාවේ සමකාමී නොවන බහුතරය විසින් සුළුතරයේ අභිලාෂයන් නොතකා හැරීම හා සමකාමීන්ට නීතියේ ආරක්ෂාව ලබා දීම ප්‍රතික්ෂේප කර ඇති වාතාවරණයක් තුළ සංහිඳියාව ඇති කළ නොහැකි බවයි ආචාර්ය විසාකේස චන්ද්‍රසේකරම් පෙන්වා දෙන්නේ.
අප්‍රිකානුවන්ගේ පාඩම
සංහිඳියාව කරා යෑමේදී සමකාමී සහ සංක්‍රාන්ති ලිංගික ප්‍රජාව අත නොහැරිය යුතුය යන පාඩම ලෝකයට කියා දෙන්නේ බටහිර යුරෝපීයයන් නොව නොදියුනු ගෝත්‍රවාදීන් කියා ඇතැම් විට නොසලකා හරින අප්‍රිකානුවන් බවයි චිත්‍රපට අධ්‍යක්ෂකවරයා සඳහන් කරන්නේ.
බරපතල වර්ණභේදවාදී අරගලයකින් පසු ජය ලබන කාල වර්ණ අප්‍රිකානුවන් සුදු සුළුතරයේ අයිතීන් පිළිගන්නා නව ආණ්ඩුක්‍රම ව්‍යවස්ථාවෙන්ම සමකාමී සහ සංක්‍රාන්ති ලිංගික ජනතාවගේ අයිතීනුත් පිළිගෙන ලෝකය් ඉතා ශිෂ්ඨ සම්පන්න ප්‍රජාතන්ත්‍රීය සමාජයකට මුල පුරන අප්‍රිකානුවන් සංහිඳියාව පිළිබඳ කථිකාවක ධූරාවලි නොතිබිය යුතු යැයි කියා දෙන පාඩම ඉතා වැදගත් බවයි ආචාර්යවරයා අවධාරණය කර සිටියේ.
සුළුතරයේ සංහිඳියාව
“දෙමළාගේ ප්‍රශ්ණය විසඳල මුස්ලිම් ප්‍රශ්ණය විසඳමු හෝ ආබාධිත පුද්ගලයන්ට සමාන අයිතිවාසිකම් ලබා දීල සමකාමී හා සංක්‍රාන්ති ලිංගිකයන් ගැන සිතමු කියන්න බෑ. මේ හැම කෙනෙකුටම සමානත්මතාවයෙන් සැළකුම් ලබන්නත්, නීතියේ ආරක්ෂාව ලබන්නත් අයිතිය තිබිය යුතුයි” යන්න ආචාර්ය විසාකේස චන්ද්‍රසේකරම් කියා සිටියේ යහපාලන රජය විසින් ක්‍රීයාත්මක කර ඇති සංහිඳියා වැඩසටහන සම්බන්ධයෙන් සිලෝන් ජර්නල්ස් හා සාකච්ඡාවට එක්වෙමිනි.
තමන්ගේ පීඩාව සම්බන්ධයෙන් පෙළපාලි යන දෙමළාට ‘සමකාමීන්ට සමානත්වය දෙනු’ කියන විරෝධතා පුවරුව රැගෙන තවත් පෙළපාලියක ගමන් කරන්නත් අබාධිත පුද්ගලයන්ගේ සමාන්තමතාවය වෙනුවෙන් සටන් කරන්න සංක්‍රාන්ති ලිංගිකයෙකුට හැකි සුළුතරය සියල්ලන්ගේ එකතුවකින් තම ගැටලු විසඳා ගත යුතුය යන්නයි ඔහු යෝජනා කර සිටින්නේ.
පීඩනයට ලක්ව ඇති සියලු සුළුතරයන් විසින් සංහිඳියාවෙන් යුතුව අනෙකාගේ අයිතිය වෙනුවෙන්ද සටන් කිරීම මඟින් සුළුතරයට තම අයිතීන් දිනාගත හැකි බවට විශ්වාසය පල කරන විසාකේස සංහිඳියා යාන්ත්‍රයෙන් හිතා මතාම යම් සුළුතර කොටස් අත හැර දැමීමේ බරපතල විපාකය වන්නේ ප්‍රජාතන්ත්‍රවාදයේ ඵල භුක්ති නොවිඳින පීඩිත ජන කොටසක් ඉතිරි වීම බවත් එසේ එක් ජන කොටසක් පමණක් භුක්ති විඳිනු ලබන ප්‍රජාතන්ත්‍රවාදය සැබෑ ප්‍රජාතන්ත්‍රවාදයක් නොවන බවටද වැඩිදුරටත් අවධාරණය කළේය.
