ජුරාසික් පාක් මුල් චිත්‍රපටයේ නළු නිළි කැළ, 2021 එන ජුරාසික් වර්ල්ඩ් 3 ටත් එක්වෙයි
1993 දී කළ ජුරාසික් පාක් පළමු සිනමාපටයේ නළු, නිළියන් ජුරාසික් පාක් 3 චිත්‍රපටය සඳහා ද රංගනයෙන් එක්වීමට නියමිත බව හොලිවුඩ් ආරංචි මාර්ග සඳහන් කරයි.
ඒ අනුව සෑම් නීල්, ලෝරා ඩර්න් සහ ජෙෆ් ගෝල්ඩ්බ්ලම් 2021 දී තිරගත කිරීමට කටයුතු සුදානම් කර ඇති මීළඟ ඩයිනෝසර් ෆැන්ටසියට එක්වනු ඇත. එසේම, 2015 ජුරාසික් වර්ල්ඩ් සහ 2018 ජුරාසික් වර්ල්ඩ්: ෆෝලන් කිංග්ඩම් හි රඟපෑ ක්‍රිස් ප්‍රැට් සහ බ්‍රයිස් හොවර්ඩ් සමඟින් ඔවුන් තිදෙනා මීළඟ සිනමාපටයේ රඟපානු ඇති බවට වාර්තා වේ.
ස්ටීවන් ස්පිල්බර්ග් අධ්‍යක්ෂණය කළ ජුරාසික් පාක් පළමුවැන්නෙහි චරිත නිරූපණය කළ රංගන ශිල්පින්, ඉන්පසුව ආ චිත්‍රපට සඳහා වෙන් වෙන් වශයෙන් සිය දායකත්වය ලබා දී තිබුණි.
මුල් ජුරාසික් පාක් සිනමාපටය මිෂෙල් ක්‍රිච්ටන්ගේ නවකතාවක් ඇසුරින් නිර්මාණය කරන ලද්දකි. එය එදා මෙදාතුර වැඩිම ආදායම් ලැබූ සිනමාපටයක් වූ අතර ඔස්කාර් සම්මාන ත්‍රිත්වයකින් ද පිදුම් ලැබී ය.
තව වසර දෙකකින් එළිදැක්වීමට නියමිත ජුරාසික් වර්ල්ඩ් 3 ජුරාසික් සිනමාපට මාලාවේ 6 වැන්න වේ.
