“රුසියානු සාහිත්‍ය උත්සවය” 6 වැනිදා, කෘති රැසක් එදින එළිදකියි
රුසියානු සාහිත්‍යයේ ආරම්භකයා ලෙස සැලකෙන අලෙක්සන්දාර් පුෂ්කින්ගේ 220 වැනි ජන්ම සංවත්සරය, නිකොලායි ගොගොල්ගේ 210 වැනි ජන්ම සංවත්සරය සහ රුසියානු සාහිත්‍ය කෘති රැසක් සිංහලයට පරිවර්තනය කළ දැදිගම වින්සන්ට් රුද්‍රිගූගේ 90 වැනි ජන්ම දින සංවත්සරය සමරනු වස් සංවිධාන කරන මෙවර රුසියානු සාහිත්‍ය උත්සවය නොවැම්බර් 6 වැනිදා පැවැත්වීමට නියමිත ය.
උලෙළ පස්වරු 4ට කොළඹ නිදහස් මාවතේ පිහිටි රුසියානු කේන්ද්‍රයේ දී ආරම්භ වන අතර පොත් සල්පිල සහ සේයා රූ දැක්ම සවස 3 සිට විවෘත වේ.
අගනා රුසියානු පරිවර්තන කෘති ඇතුළු කෘති කිහිපයක්ම එදින එළිදැක්වීමට ද කටයුතු යොදා තිබේ. ඒ අනුව, චූලානන්ද සමරනායක විසින් පරිවර්තනය කළ “පුෂ්කින් කල්පයක් පවතින නිමේෂයක්” රොබට් චාන්ඩ්ලර්, අර්සාදී ගයිදාර්ගේ “තිමුර් සහ බලකාය”, ව්ලැදිමීර් සොරොකින්ගේ “පෝලිම”, කරුණාතිලක හඳුන්පතිරණ රචිත “අලෙක්සන්දාර් පුෂ්කින්-ජීවිතය හා තෝරාගත් කෙටි කවි”, ආරියරත්න විතාන පරිවර්තනයක් වන නිකොලායි ගොගොල්ගේ “සිකුරු යුද්දේ”, ඩබ්.ඒ.අබේසිංහ රචිත “පුෂ්කින් සහ ගොගොල්” (ස්වයං නිර්මාණ), පුෂ්ප රංජන් විජේසිංහ පරිවර්තනයක් වන බොරිස් අකුනින්ගේ “ඔර්ලොව් දියමන්තියේ සාපය”, “චිංගිස් අයිත්මාතව්ගේ සරෝනෙත් බිමේ දුක් ගීතය”, ෆිලික්ස් ප්‍රනාන්දුගේ පරිවර්තනයක් වන “අලෙක්සන්දාර් සොල්ෂෙනීට්සින්ගේ ටෝපිඩෝව සහ තෝරාගත් වෙනත් කෙටිකතා”, සරත් ලාල් කුමාර රචිත “අද රුසියාව”(ස්වයං නිර්මාණ), “අමරණිය මිනිසා-දැදිගම වී.රොද්‍රිගෝ(ස්වයං නිර්මාණ), සිරිමාන්න කරුණාතිලක රචිත “දැදිගම වින්සන්ට් රුද්‍රිගු-දෙරටක් යා කළ මානවවාදී සාහිත්‍යධරයා (ස්වයං නිර්මාණ) එහිදී එළිදකිනු ඇත.
කතුවර ආරියවංශ රණවීර, අධිනීතිඥ එස්. ජී. පුංචිහේවා සහ ආචාර්ය ඩබ්.ඒ. අබේසිංහ මෙදින සමරු දේශන පවත්වනු ලැබේ.
එදිනට එක්වන මෙන් ඔබටත් ඇරයුම්!
