ශ්‍රීකාන්ත් දේවා සංගීත නිර්මාණය කරන ලද සහ ශ්‍රී ලාංකික කිවිවර අස්මින් උතුමාලෙබ්බේ හෙවත් 'පොතුවිල් අස්මින්' විසින් රචනා කරන ලද 'මුත්තකන්නි' ගීතය පසුගිය මැයි පළමුවැනිදා සවස 07ට නිකුත් කෙරුණේ ඉන්දියාව, ශ්‍රී ලංකාව සහ තවත් රටවල් 25ක සංගීත පුරාවෘත්ත 200ක සුබ පැතුම් මධ්‍යයේය.
ජර්මනියේ පදිංචි දෙමළ ගායකයෙකු වන මුල්ලේ සසි විසින් ගීතය ගායනා කරනු ලබන 'මුත්තකන්නි' ගීතයට ප්‍රසිද්ධ දමිළ සිනමා නර්තන ශිල්පී ශ්‍රීධර් මාස්ටර් සහ ගයත්‍රි ශාන් ගීතයට රංගනයෙන් දායක වී තිබේ.
ගීතය ප්‍රසිද්ධ ගායක සහ කලා ලැදි පාර්ශ්ව 100 දෙනෙකු විසින් ඔවුන්ගේ සමාජ මාධ්‍ය ගිණුම්වල එකවර ලොව පුරා නිකුත් කිරීමට නියමිතව තිබූ අතර පසුව එම සංඛ්‍යාව 200 දක්වා ඉහළ නැංවිණි.
ලොව පුරා ජනප්‍රිය ලාංකික දෙමළ ගීතයක් වූ 'අයියෝ සාමි' ගීතයේ රචකයා වූ අස්මින් මේ වන විට දශකයකට අධික සිය මාධ්‍ය ජීවිතය අතැර ඉන්දියාවේ ස්ථිර ගී පද රචකයෙකු ලෙස කටයුතු කරයි.
ඉන්දියාවේ ජනප්‍රිය නළු තලපති විජේගේ දේශපාලන ගමනේ තේමා ගී රචකයා වීමට සමත් වූ අස්මින් ඉන්දියාවේ බෙහෙවින් ජනප්‍රිය වූයේ තමිල්නාඩු මහ ඇමතිනී ජයලලිතා ජයරාම්ගේ අභාවය වෙනුවෙන් සැකසූ අවමංගල ගීතය ලිවීමෙනි. අස්මින්ගේ ගී රචනා සමග ලාංකේය ගායක ගායිකාවන්ද කොලිවුඩ් ගීත කලාවට එක් වූ අතර පසුගියදා ශ්‍රී ලංකාවේ වැඩි අවධානයක් දිනා ගත් ගායක රවී රොයිස්ටර් වෙනුවෙන්ද ගීතයක් රචනා කර තිබේ. අස්මින්ගේ කොලිවුඩ් සිනමා ගී රචනයේ ආරම්භක චිත්‍රපටයේ නළුවා වන්නේද විජේ ඇන්ටනී වන අතර විජේගේ දියනියගේ හදිසි වියෝව මොහොතේද අස්මින් ගීතයක් ලියා සිය මිතුරාගේ දියනියට ආචාරය දැක්වූයේය.
අස්මින් යනු කවුදැයි කෙටියෙන් කියවා ගත හැකි පසුගිය කාලයේ 'අනිද්දා' පුවත්පතට සකස් කළ ලිපියක් මේ සමග පළ වේ.
අස්මින්ගේ අලුත් ගීතය
-------------------------------------------------------------------
අස්මින් උතුමාලෙබ්බේ හෙවත් පොතුවිල් අස්මින් යනු නමින් මුස්ලිම් මිනිසෙකි. ඔහු කවි ලියන්නේ දෙමළෙනි. සිංහලෙන් සන්නිවේදනය කරන්නේය. ඉංග්‍රීසි ඔහුගේ භාෂාවකි. ලංකාවේ ජාතික අනන්‍යතාව ගැන සරල කෙටි හැඳින්වීමක් කියාදෙන්නට සරිලන විදිහේ නිර්මාණකරුවෙකි. අස්මින් ගැන ලංකාවේ මිනිසුන් දන්නේ රටේ විශාලත්වය අනුව නමුත්, මේ වන විට අස්මින් යනු ලෝකයක් දන්නා ලාංකිකයෙකි. වර්තමනායේ ඉන්දියාවේ කොලිවුඩ් සිනමාවට ගී පබඳින්නෙකු වන අස්මින් ලංකාවේ මිනිසුන් හඳුනන්නේ 'අයියෝ සාමි' ගීතයේ පද රචකයා හැටියටය.
කවිකමේ පුහුණුව සහ ළමාවිය
1983 මැයි දෙවැනිදා උපන් අස්මින්ගේ මුත්තණුවන් තමිල්නාඩුවේ රාමනාදපුරම්හි උපන් අයෙකි. අම්පාර දිස්ත්‍රික්කයේ පිහිටි පොතුවිල් ප්‍රදේශය තුළ ජාති, ආගම් විවිධත්වය යන පොදු ලක්ෂණ දෙස සාධනීයව බලමින් වැඩුණු අස්මින්ගේ පියා උතුමාලෙබ්බේ ය. මව අයිෂා වන්නීය. අස්මින්ගේ කාව්‍යකරණයේ සහ නිර්මාණකරණයේ හැකියා දලුලෑමට පටන් ගන්නේ යෞවන වියේදීමය. 09 ශ්‍රේණියේදී (1997) කාව්‍ය සංග්‍රහයක් පළ කිරීම දක්වා ඔහුගේ කාව්‍ය නිර්මාණ ඉතිහාසය දිව යන අතර එය ආදර කාව්‍යයන්ගෙන්ද සමන්විත වන බව අස්මින් පවසයි. පොතුවිල් මධ්‍ය මහා විද්‍යාලයේ මූලික අධ්‍යාපනය 1 ශ්‍රේණියේ සිට උසස් පෙළ වන තුරුම අස්මින්ට කාව්‍යකරණයට නිසි පිටිවහලක් හිමි වූ බවත් කාව්‍යකරණයට මූලික අඩිතාලම කියවීමෙන් වැටුණ බවත් අස්මින්ගේ අදහසය. එහි ප්‍රතිඵලය වන්නේ උසස්පෙළ වසර දෙක තුළදී අස්මින් කාව්‍ය කෘති දෙකක් ලියා තැබීමට සමත් වීමය.
"දෙමළ කාව්‍යකරණය පුහුණු වෙන්න නම් අනිවාර්යයෙන් කියවීම පුහුණු කරන්න ඕන. අපේ ගෙදර ඉස්සර 24 පැයේම රේඩියෝ එක දාලා තියෙන්නේ. මම නිදියන්නෙත් ඒ කාලේ රේඩියෝ දාගෙන. 'ලයිබ්‍රි' යනවා. පාසල් කාලේ නිවාඩු දවස්වල ලයිබ්‍රි ගියාම උදේ ඉඳන් හවස් වෙනකල් ඒකෙ තමයි ඉන්නේ. ඩිජිටල් ලෝකයේ නිර්මාණ අඩු වෙන්නත් ඒක හේතුවක්. නිර්මාණශීලීකම අඩුයි එතකොට. ඉන්දියාවට වඩා උසස් විදිහට ලියන කවියන් ලංකාවේ ඉන්නවා. ඔවුන්ගේ කවි ඉතා උසස්. ඒ නිසා කියවීමේ පුහුණුව නිර්මාණවලට අවශ්‍යමයි." අස්මින් පවසයි
මාධ්‍යකරණය යනු කාව්‍යකරණය තරම්ම අස්මින්ගේ ජීවිතය හා බැඳුණු භූමිකාවකි. උසස්පෙළින් පසුව දෙමළ සාහිත්‍යය පිළිබඳව ශාස්ත්‍රපති උපාධිය මදුරෛ කාමරාජ් සරසවියෙන් ලබාගත් ඔහු කොළඹ විශ්වවිද්‍යාලයෙන් ජනමාධ්‍යවේදී ඩිප්ලෝමාව, චීනයෙන් ලද ශිෂ්‍යත්වයක් මත ලැබූ වාර්තා චිත්‍රපටි සහ අලෙවිකරණ පුහුණුවත් ලැබූ අයෙකි. 2008දී ශක්ති ටීවී නිශ්පාදන අංශයේ සේවය කරන අස්මින් 2009 - 2022 කාලයේ අයිටී එන් මාධ්‍ය ජාලයේ වසන්තම් ටීවී නිෂ්පාදකවරයකු ලෙස කටයුතු කිරීම අරඹන්නේය.
අස්මින් 'පොතුවිල් අස්මින්' බවට එතෙක් කාව්‍යකරණයේ නියැලෙන්නන් දැන සිටියත් කොලිවුඩ් ලෝකයේ පොතුවිල් අස්මින් මුද්‍රා තැබීමට ඔහුට අවස්ථාවක් ලබෙන්නේ 2008දී ශක්ති ටීවී නිෂ්පාදන අංශයේ සේවය කරන අතරතුර 'ඉසෛ ඉලවර්සකල්' දෙමළ ගී පද රචනා ජාත්‍යන්තර තරඟයට අයදුම් කිරීමෙන් අනතුරුවය. එයින් ජයග්‍රහණය කරන මේ නිර්මාණකරුවාට කොලිවුඩ් විනමාවට ගී ලියන්නට අවස්ථාව ලැබෙන්නේ 2012 විජේ ඇන්තනීගේ 'නාන්' චිත්‍රපටිය සමගිනි. ඒ අනුව අස්මින් සිය පළමු කොලිවුඩ් ගීතය පබඳී. ඔහු වසන්තම් ටීවී හා සම්බන්ධ වූ පසුවද (2009) කොලිවුඩ් ආගමනයේ අවස්ථා අත් නොහැරගනිමින් සිය මාධ්‍ය භූමිකාවද සමබර කරගෙන ඉදිරියට ගියේය. 2003 -2016 වකවානුවේ යුනිසෙෆ් සංවිධානයේ පාසලක ගුරුවරයෙකුද හැටියට ඔහු ඒ අතරේ කටයුතු කළේය.
ඉන්දියාව කෝටි 10ක ජනගහනයක් ඇති රටකි. එහෙව් රටේ සිය නම මුද්‍රා කිරීම අස්මින්ට ලේසි එකක් වන්නේ ඔහුගේ කවීත්වය නිසාමය. අස්මින්ගේ නම මුස්ලිම්ද, ලියන්නේ දෙමළද, කතා කරන්නේ සිංහලද කියා ඒ ලෝකයේ මිනිසුන් ඔහුගෙන් අසන්නේ නැත. ඒ ලෝකයේ මිනිසුන්ට ඕනා ඔහුගේ කවි හා ගීත පමණි. අස්මින්ගේ එකී අන්න්‍යතාව පමණක් සැබෑ රසිකයින්ට ප්‍රමාණවත් බව ඔහු පවසයි. නිර්මාණවලින් තමන් පිනවීම පමණක් අපේක්ෂා කරන බව පමණක් ඔහුට දැනී තිබෙන බව අස්මින් ප්‍රකාශ කරන්නේය. ලංකාව තුළ පෞද්ගලිකව සිදු වූ කලකිරීම් හේතුවෙන් අනන්න්‍යතාව සැක නොකරන කොලිවුඩ් ලෝකයට සංක්‍රමණය වීමට ඔහු සිතන්නේ එනිසාමය. නමුත්, කලකිරීම් පසෙක තබා සිනාසෙමින් ගී පබැඳීමට තරම් තමන් පොහොසත් බව අස්මින් අපට පෙන්වා දෙයි. කොලිවුඩයට බට මේ වටිනා ලාංකිකයා වටා දෙමළ අසන්නන්, රසිකයින් මෙන්ම ලාංකිකයින්ද බහුතරයක් ගොනු වන්නේ එහෙයිනි.
"මම කවුද කියනවා නම් අස්මින් කියන්නේ 'වන් මෑන් ආමි' එකක්. මට මෙහි උදව් කරන්න කවුරුත් නෑ. හැමෝම ගෞරව කරන්නේ මගේ හැකියාවට. මම දක්ෂ බව හැම කෙනාම එක වගේ පිළිගන්නවා. ඒ සඳහා මට අවස්ථාව ලැබෙන්නේ ඒ නිසයි. ගීත රචනා තරඟෙකින් ජය ගත්ත ගමන මේ දක්වා එන්න ලැබුණේ මගේ ගීතවල තියෙන, දෙමළ භාෂාවට පහසු කාව්‍යාත්මක ගුණය නිසයි. මෙහෙ මම මුස්ලිම්ද කියලා කවුරුත් අහන්නේ නෑ. මගේ භාෂාව හැසිරවීම කවුරුත් ප්‍රශ්න කරන්නේ නෑ. මම පොඩි කාලේ ඉඳන් ආසා කළ ඉන්දියාවේ කවියෙක් වුණ වෛරමුත්තු මට දැන් හමුවෙනවා. රජිනි කාන්ත්ගේ 'අන්නාතේ' චිත්‍රපටියේ ගීත රසිකයින් ආදරෙන් වැළඳගත්තා. ඔවුන් මාව අගය කරනවා. නැත්නම් කෝටි 10ක ජනගහනයක් ඉන්න රටේ ගීත ලියාගන්න මා ළඟට මිනිස්සු එන්නේ නෑ. කවුරුත් උදව් කරන්නේ නෑ. මගේ හැකියාවට තමයි සම්පූර්ණ අවධානය ඔවුන්ගේ තියෙන්නේ. මම දැන් කලාකරුවෙක් හැටියට මුළු ලෝකයක් ඉදිරියේ ඉන්නේ." ඒ අස්මින්ගේ අදහසයි.
තමිල්නාඩුවේ ආදරය අස්මින්ගේ ගමනට ආලෝකයක් බවට හැඟෙන්නේම ඔහුගේ පළමු කොලිවුඩ් ගීතය සමගයි. 'නාන්' චිත්‍රපටියට ගීත රචනා කළ පළමු අවස්ථාවේදීම අස්මින් දෙමළ ගී රසිකයින් අතර ජනප්‍රිය වූවා සේම කොලිවුඩයේ දැවැන්තයින්ගේ අවධානයද තමන් වෙත යොමු කරගත්තේය. ඔහුගේ රචනාවල ඇති කවීත්වය දෙමළ ගීත සංගීත සංයෝජනය කරන්නන්ගේ පහසුවට කරුණක් වූ බව අස්මින් පවසයි. ඔහු මුල සිටම ගායනය කළ හැකි ආරයේ දෙමළ කවි පබැඳීමට ගත් පුහුණුව මෙම අවස්ථාවට හේතු වූ බව අස්මින්ගේ අදහසයි. අස්මින් මෑතකදී රංගන ශිලිපී විජය ඇන්ටනිගේ දියනියගේ වියෝව වෙනුවෙන් ලියූ ගීතය බොහෝ දෙනෙකුගේ හද කම්පා කරවන්නක් බවට ප්‍රතිචාර ඇසෙමින් තිබේ.
නමුත්, තමන් කොලිවුඩයට සංක්‍රමණය වීමට හේතු වූ කාරණයද අස්මින් පළමු වරට මාධ්‍යයකට හෙළි කළේ තමන් පාස්කු බෝම්බ ප්‍රහාරයෙන් අනතුරුව ත්‍රස්තවාදියකු යන සැකයෙන් බලන්නට පටන් ගැනීම පිළිබඳව පුදුමසහගත කතාවක් පවසමිනි.
නමුත්, තමන් කොලිවුඩයට සංක්‍රමණය වීමට හේතු වූ කාරණයද අස්මින් පළමු වරට මාධ්‍යයකට හෙළි කළේ තමන් පාස්කු බෝම්බ ප්‍රහාරයෙන් අනතුරුව ත්‍රස්තවාදියකු යන සැකයෙන් බලන්නට පටන් ගැනීම පිළිබඳව පුදුමසහගත කතාවක් පවසමිනි.
"මට බොහෝම අපහසුතා ඇති කළා. මම ස්ථිර සේවකයෙක් වෙලත් පඩි රහිත නිවාඩු අනුමත කළේ නෑ, මගේ උසස්වීම් වැළකුවා. මම දුන්න කට උත්තරවලත් මම කිව්වා 'මෙහෙම බලන්න එපා, මම කලාකාරයෙක්, මුස්ලිම් වුණාට මා දිහා ත්‍රස්තවාදියෙක් විදිහට බලන්න එපා' කියලා. මම මාධ්‍යවේදියෙක් අනික. පසුව මම පාස්කු බෝම්බ සිද්ධියට සම්බන්ධ නෑ කියලා පරීක්ශණ අවසන් කළා. ඒත් ඒ වෙද්දි මගේ මානසිකත්වය බිඳ වැටිලා ඉවරයි. ඒ නිසාම රැකියාවට සමුදීලා ඉන්දියාවට ඒම සුදුසුයි කියන තීරණය මම ගත්තා. නැතිනම්, තවමත් මම ලංකාවේ මාධ්‍යවේදියෙක් වෙන්න තිබුණා. මේක මගේ පසුගාමී අදහසක් විදිහට සලකන්න එපා. ඒත් 'මැණිකේ මගේ හිතේ' කියපු යොහානි ඉන්දියාවේ ජනප්‍රිය වීම ගැන හැමතැනම ප්‍රශංසා කෙරෙද්දි ඒ වැනිම ගෞරවයක් ලබමින් සිටි මාව ත්‍රස්තවාදියෙකු ලෙස නම් කළේ මගේ නම මුස්ලිම් නිසයි. ආගම, ජාති නැතිව වැඩ කරනවා නම් මේ රට කොච්චර වටිනවද. අපිව ඒ විදිහට බෙදුවේ දේශපාලනඥයිනුයි. ඒත් මම ඒ බෙදීම එක්ක ජීවත් වන්නේ නැහැ."
ගීත රචනා කරමින් කොලිවුඩයේ යාවජීව සාමාජිකයෙකුව හැටියට සිටි අස්මින් කොලිවුඩයේ පදිංචිකාරයෙකු වූයේ එසේය. නමුත්, ඔහු නිර්මාණකරණය අතහැර නැත. ලංකාවේ බොහෝ කාව්‍ය තරඟවල සම්මාන ලැබ, ජනාධිපති සම්මානයද ලැබූ 'පොතුවිල් අස්මින්'ට වාගේම ජාතිය, නම නිසා බොහෝ දෙනෙකුට මෙවැනි දේ සිදු වුණා අපට මතකය. එසේ සැක කළ අස්මින් වැන්නන් රටේ නම, ගමේ නම බබළමින් සිටිනවා සමහරෙකු දන්නේවත් නැත.
ශිවන්ති ප්‍රනාන්දු - අනිද්දා පුවත්පත
