“ගාඩි” ඉන්දීය මංගල දැක්ම හෙට කේරළ සිනමා උලෙළේ දී

සම්මානිත සිනමාවේදී ප්‍රසන්න විතානගේගේ දසවැනි සිනමා නිර්මාණය “ගාඩි” හි ඉන්දීය මංගල දැක්ම හෙට (9) 24 වැනි කේරළ අන්තර්ජාතික සිනමා උලෙළේ දී සිදු කිරීමට නියමිත ය.

ඒ අනුව ජූරියේ සිනමාපට කාණ්ඩය යටතේ “ගාඩි” හෙට පස්වරු 6.15 ට ශ්‍රී සිනමා ශාලාවේ දී තිරගත කෙරේ.

කේරළ අන්තර්ජාතික සිනමා උලෙළ දෙසැම්බර් 6 වැනිදා ආරම්භ කළ අතර දෙසැම්බර් 13 වැනිදා දක්වා ඉන්දියාවේ කේරළයේ දී පැවැත්වේ.

ශ්‍රී ලංකා, ඉන්දියා සහ යුරෝපිය සම නිෂ්පාදනයක් ලෙස නිමවූ මෙම සිනමාපටයේ ලෝක මංගල දැක්ම පසුගිය ඔක්තෝබරයේ පැවැත්වුණු බූසාන් අන්තර්ජාතික සිනමා උලෙළේ දී ද, ඇමරිකානු මංගල දැක්ම පසුගිය නොවැම්බරයේ පැවැත්වුණු සැන් ෆ්‍රැන්සිස්කෝ අන්තර්ජාතික දකුණු ආසියානු සිනමා උලෙළේ දී ද සිදු කෙරුණි.

සජිත අනුත්තර ඇන්තනි සහ ඩිනාරා පුංචිහේවා ප්‍රධාන චරිතවලට පණ පෙවූ “ගාඩි” එළඹෙන වසරේ දී දිවයින පුරා ප්‍රදර්ශනය කිරීමට නියමිත ය.