බ්ලේඩ් රනර් නළු රට්ගර් හවර් දිවියෙන් සමුගනියි
1982 දී බ්ලේඩ් රනර් සිනමාපටයේ රඟපෑ ප්‍රවීන රංගන ශිල්පී රට්ගර් හවර් අභාවප්‍රාප්ත වී තිබේ.
මියයන විට ඔහු 75 හැවිරිදි වියේ පසුවිය.
නෙදර්ලන්තයේ සිටියදී හදිසියේ රෝගාතුර වීම නිසා පසුගිය සිකුරාදා හවර් දිවියෙන් සමුගෙන ඇති බව ඔහුගේ කළමනාකරු තහවුරු කර ඇත.
ඔහුගේ අවමංගල්‍ය කටයුතු පසුගිය බදාදා දින සිදු කර තිබේ.
රිඩ්ලි ස්කොට් අධ්‍යක්ෂණය කළ හැරිසන් ෆෝඩ් රඟපෑ බ්ලේඩ් රනර් චිත්‍රපටයේ රෝයි බැටී නම් මිනීමරු චරිතයට හවර් පණ පෙවුවේ ය.
එසේම සින් සිටි, බැට් මෑන් බිගින්ස් ඇතුළු සිනමාපට කිහිපයකත් HBO ටෙලි මාලාවක් වන “ත්රූ බ්ලඩ්” සඳහා ද ඔහු රංගනයෙන් දායක වී ඇත.
සිනමාවේදීන්, රංගන ශිල්පින්, රසිකයින් ඇතුළු විශාල පිරිසක් රට්ගර් හවර් අභාවය පිළිබඳ සමාජ මාධ්‍ය ඔස්සේ සිය ශෝකය පළ කර තිබේ.
