Exorcist, Flash Gorden සහ Game of Thrones වැනි සිනමා සහ ටෙලි නිර්මාණ සඳහා සිය රංගන දායකත්වය ලබාදුන් ප්‍රවීන රංගන ශිල්පී මැක්ස් වොන් සයිඩෝ අභාවප්‍රාප්ත වී තිබේ.

මියයන විට ඔහුගේ වයස අවුරුදු 90 කි.

“බිඳුණු හදවතින් සහ අසීමිත දුකකින්” යුතුව ඔහුගේ පවුල නිවේදනය කර ඇත්තේ ස්වීඩනයේ උපන් මේ රංගන ශිල්පියා ඉකුත් ඉරිදා මෙලොව හැර ගිය බව යි.

Hannah and Her Sisters, The Seventh Seal සහ Star Wars: The Force Awakens මැක්ස් වොන් සයිඩෝ රඟපෑ  ජනප්‍රිය සිනමාපට කිහිපය කි.

Pelle the Conqueror සිනමාපටයේ රංගනය වෙනුවෙන් 1988 දී හොඳම රංගන ශිල්පියාට හිමි ඔස්කාර් සම්මානය සඳහා ද ඔහු නිර්දේශ විය. ඒ අනුව සිය රංගන දිවිය තුළ ඔහු ලැබූ ඔස්කාර් නිර්දේශ ප්‍රමාණය දෙකකි.

මැක්ස් වොන් සයිඩෝ අවසන් වරට රංගන දායකත්වය ලබාදුන් ටෙලි මාලාව “ගේම් ඔෆ් ත්‍රෝන්ස්” වන අතර ඔහු එහි ත්‍රී-අයිඩ් රේවන් චරිතයට පණ පොවනු ලැබුවේ ය. ඔහුගේ අවසන් සිනමා රංගනය වන්නේ Kursk සිනමාපටය  යි. ඒ 2018 දී ය.