ඡන්දය දෙන්න කියා දබර ඇඟිල්ල පෙන්නන බොලිවුඩ් තරු  

මේ ඉන්දීය මහ මැතිවරණය පැවැත්වෙන සමය යි. අදියර හතක් යටතේ පැවැත්වෙන මේ මැතිවරණයේ දී ඡන්දය ප්‍රකාශ කිරීමට ජනතාව උනන්දු කිරීම සඳහා බොලිවුඩ් රංගන ශිල්පින්, ශිල්පිනියන් ද ඉදිරියට පැමිණ ඇති වග එරට මාධ්‍ය වාර්තා කර සිටිනවා.

ඡන්දය ප්‍රකාශ කරන සේ ඉල්ලා ජනප්‍රිය නළු ශාරුක් ඛාන්, රැප් ගීතයක් පවා පසුගිය සතියේ නිකුත් කර තිබුණා. “ඡන්දය ප්‍රකාශ කිරීම අපගේ අයිතියක් පමණක් නොව එය අපේ බලය යි,” යනුවෙන් ට්විටර් පණිවිඩයක් ද ඒ අනුව ඔහු පළ කළා.

ඉන්දීය මහ මැතිවරණයේ සිව් වැනි අදියර යටතේ ඡන්ද විමසීම අද 29 පැවැත්වුණු අතර බොලිවුඩ් නළු නිළියන් ද ඡන්දය ප්‍රකාශ කිරීමට පැමිණ ඇති අයුරු එරට මාධ්‍ය වාර්තා කර තිබුණා.

ඡන්දය ලබා දුන් බවට සහතික කිරීම සඳහා දබර ඇඟිල්ලේ අඳින ලද තීන්ත සලකුණ පෙන්වමින් සමාජ මාධ්‍ය ජාලවල ඡායාරුප පළ කරන්නටත් ඔවුන් කටයතු කර තිබුණා.